ZPM lo sawhthing lei sak loah vau?

Vawiin (18.2.2026) Assembly Session-ah East Tuipui Bialtu MLA Ramthanmawia chuan a bial chhung khaw pathumah ZPM ni lote chu sorkarin sawhthing a leisak dawn lo tihna a awm thu sawiin, “A ziak pawh ka nei,” a ti. Chief Minister Lalduhoma’n East Tuipui Bialtu MLA hi a copy a dil.

Ramthanmawia chuan, “Ka bial khaw thumah sawhthing chingtute society-a inziaklut mai ni lo, ZPM-ah membership fee an pek loh chuan, chu pawh a la ni lo, lawmluh nia an din loh chuan an la tih lehzel. Sorkarin sawhthing an leisak dawn lo tih a awm, a ziak pawh ka nei. Hei hi sorkarin a hriatpuia tih nge, a serious ka ti. Hei hi maw mipui sorkar chu, sorkar thianghlim, felfai leh langtlang turin kan lo beisei a ni. Miin an kut hnathawh an thar chhuah a ni a, a sem a sem a ni lo. NLUP leh SEDP-te chu a sem a sem a ni,” a ti.

East Tuipui Bialtu MLA thusawi chungchangah hian Chief Minister Lalduhoma chuan a copy pe tura a duhthu sawiin, “A tak a nih chuan action kan la ang,” tiin a dik lo a nih pawhin an umzui tur thu a sawi.

Agriculture Minister PC Vanlalruata chuan sawhthing leiah tumah enhran an neih loh thu sawiin, Ramthanmawia thusawi chu sorkar ang chuan an hriatpui loh thu a sawi a, “Nikuma sawhthing tam ber ber chu Congress leh MNF an ni. A chhan chu an dinhmun a tha a, a chi a to avangin dinhmun a that loh chuan a chin tam theih loh,” a ti.