ZPM-in ram an hralh &#8211; Zoramthanga

Vawiin (4.11.2025) hian Lungsen Chhimveng YMA-ah MNF chuan political training an buatsaih a, an hun hmanpuitu MNF President Zoramthanga chuan ZPM dawtsawi sawi sawisen a nih loh thu leh ZPM Sorkarin ram an hralh thu a sawi.

Zoramthanga chuan hnam thinlungpu thalaiten ZPM Sorkar hi an kham tawh tih sawiin, ‘Pathianin Zoram hi a hmangaih a, hun khirh tak karah pawh a hruaichhuak thin. Pathian remruat vangin MNF kan tla a, ZPM an sorkar a, enchhin sorkar mai an ni. Saiip puan sina bultan chu zu khapna dan ennawnnain a zui,’ a ti.

Contract hna inpeknaah nasa takin pawi an khawih tih sawiin MNF President chuan, ‘Ram an hralh a, kan rohlu tihral an an tum zel. Kawngchhiat lutuk avangin hnamdangte phei chuan lirthei chunga chuang chung pawhin kawng an hmu thei lo hial a ni. Dawt an sawi zozaite hi sawisen a ni lo,’ tiin ‘dawt sawiah pawh hian a chintawk a awm asin mawle’ tih hial tur an nih thu a sawi.

Zoramthanga chuan ZPM Sorkar pawikhawih zozaite MNF Sorkar leh hunah siamthat leh a nih tur thu sawiin, ‘Nuaibo vek a ni ang. Opposition party atangin ruling party ah mi an lut thin a ni. Tunah erawhchuan, ruling atangin opposition MNF-ah hmun hrang hrang atangin an rawn lut zel. MNF-in thuneihna a neih leh thuai dawn vang a ni,’ a ti.

MNF thuchhuah tarlan danin, MNF President hian ZPM Party atangin mi 121, Congress Party atangin mi 75, BJP atangin mi 28 leh neutral 16 MNF Party-ah lawmluh an ni.