News

Health Minister Lalrinpuii chuan vawiin (19.8.2026) khan Zoram Mecical College & Hospital (ZMC&H) ah a vawi khatna atan hlawhtling takin Lung zai (open–heart surgery) neih a nih ve tak thu leh ZMC&H in hma a sawn zel thu a tarlang.

Health Minister tarlan danin, Open Heart Surgery (Coronary Artery Bypass Graft) hi Lung zai thiam Cardiothoracic Surgeon Dr. Mary Hmingthantluangi leh phai lam aṭanga sawm Dr. Intekhab Alam, Cardiothoracic Surgeon, Apollo Excel Hospital, Guwahati te chuan neiin, heart attack avanga lung thisen zam ṭha lo nei, kum 69 mi chu darkar 6 leh a chanve chhung zet zaiin, hlawhtling takin an zai a ni.

Doctor-te hian thisen zam pawimawh pathum block te an siam that chhungin, damlo lungphu an titawp lailawk a. Lung hnathawh hi khawl (Heart-Lung machine) hmanga chhawk niin, thisen-zam siamṭhat a nih hnuah Lung hi an tinung leh . Lung-a thisen zam chhia te siamṭhat nan hian damlo ke-a thisen zam (saphenous vein) leh damlo awm (chest)-a thisen zam (LIMA) te an hmang a ni.

Open Heart Surgery hlawhtling taka neih a nih theih nana thawktu – Surgeons te, Anaesthesiology Team te, Cardiologist, Dr. Lalṭhafala te leh OT nurses leh thawktu dang zawng zawngte inpeknaah Health Minister chuan lawmthu a sawi.