Zirlaite pawimawhna CM-in a sawi

Vawiin (December 5 2025) chhun khan Chief Minister Lalduhoma chuan Hmar Students’ Association General Assembly vawi 60-na, Saipum khuaa neih chu a hmanpui a, zirlaite pawimawhna leh an hmalaknate a sawi.

Chief Minister chuan, “Vawiina zirlaite hi naktuk lawka ram enkawltu turte an ni, an tih thin angin, khawvel hmun dangah zirlai movement pawimawh tak tak a lo piang tawh thin. Kum 1919-a ‘May Fourth Movement’ an tih te, South Korea ram democracy a lo channa bul, 1987 June Democracy movement an kalpui te leh hmanni lawka Hongkong-a thil thleng, ‘Umbrella Movement’ tia an sawi zui takte thlengin zirlaite hmalakna a ni thin. Chuvangin, zirlaite hi ram leh hnam tha zawk nei turin kan pawimawh a, kan ramin resource a neih ropui ber chu a mihring chengte hi kan ni a, vawiina lo kal khawmte hi ram hmasawnna tura mawhphurtute kan ni,” a ti.

Sawi chhunzawmin Chief Minister chuan, “Zirlai sawrkar hnathawk tumte tan hna kan la chur chur. Hna thar kan siam bawk a, zirna sang zawk zir tumte tan chak takin kan pen. Mahni kea din tumte chu an bana kaia khai chhuak turin Bana Kaih Scheme tha em em kan siam a, agriculture lama thawkte leh thawh tumte thlai thar kan lei sak,” tiin mitin tan remchanna an siamsak chur chur thu a sawi.