Dec 13, 2025
Saturday
Hunpui lo thleng turah lirtheia veivak an tam thin avangin, lirthei hmanga intih palh venna chi khat atan AMC Ward VIII Corporator Christina Roluahpuii Sailo hmalaknain an ward chhungah zebra crossing (mihring kalna tur) eng emaw zat rin thar a ni.
Corporator hmalaknain a bial chhung Armed Veng, Armed Veng South leh Chite Veng Local Council-te chu an veng chhung kawngpuia mipuiin kawng an kan (cross) tamna deuh lai thlan chhuah tir an ni. Heng hmunahte hian lirtheia veivakte an fimkhur theihna atan zebra crossing rin a ni a, a vaiin hmun 14 ah an rin.
Traffic Police atangin zebra crossing rin thiam koh an ni a, Corporator-in a rinna hmanrua leh tul dangte ngaihtuahin, amah leh Local Council-te enpuina hnuaiah zebra crossing hi rin a ni.
Christina-i chuan an bial chhunga zebra crossing rinna zawnah lirtheia veivakte chu fimkhur zual tura chahin, “Mipuite zebra crossing-a an kal laiin motor-in an sut chuan thiam an chang thei a ni. Mitin hunpui lo thleng turah hian i fimkhur ang u,” a ti.
