Zangnadawmna pe turin ti

Mizoram State Consumer Dispute Redressal Commission (State Consumer Court) chuan Serchhip District Hospital-a Malsawmkimi, Tlangpui khua nau chunga a thih avangin Mizoram Sorkar chu zangnadawmna ₹52,20,800 pe turin a ti.

Mizoram State Consumer Dispute Redressal Commission tarlan danin, kum 2021 khan Malsawmkimi hian nau nei turin Serchhip District Hospital panin a inentir a, ultrasound-te tih a nih hnuah nau nei turin admit a ni. Admit a nih hnu hian damdawi hmangin nau vei chawp tir a ni a, damdawi hmanga nau vei tir a nih ni hnihna zan dar 8:30 ah naute a thi sa in a hring a ni.

Nau vei tir a nih hma hian naute leh a nu hi an tha vekin doctor chuan a ngai a mah se, naute hi thi saa a pian hnu lawkah thi put neiin a thi put chu a nasat tak avangin a hnu lawk zan dar 10:40-ah Malsawmkimi hi chu Post Partum Haemorrhage (PPH) avangin a thi ve leh a ni.

Malsawmkimi hian a hmain nau vawi 4 lai a lo chhiat tawhin, neih pangngaiin nau pathum a nei tawh thung a ni.

Malsawmkimi thih chungchangah hian a pasal Zaithankima chuan felhlel a awm ni a ngaiin Gauhati High Court (Aizawl Bench) ah a zualko a, Gauhati High Court hian Serchhip District Hospital-in Malsawmkimi an enkawl danah hian felhlel awm ngei ni a a hriat avangin cheng nuai 5 a lo chawi tir tawh a ni. Chutih rualin zangnadawmna tam zawk phuta hmun danga an zualko duh a nih pawhin a phal sak

Zaithankima hian State Consumer Court-ah thubuai thehlutin a zualko leh ta a ni.