YLA-in auto rickshaw pali an man

Nizan (7.9.2026) zanlai khan, Lawngtlai AOC Veng Branch Young Lai Association (YLA) duty-te’n Assam lam atanga rawn ruk nia hriat auto rickshaw pathum, registration plate pawhthlak vek chu an duty post-ah an lo man.

Heng auto ricskhaw-te hi KMMTTP Road kaltlangin Myanmar lama hralh tum nia hriat a ni. Vawiin hian auto rickshaw-te hi Patharkandi Police, Assam kutah hlan nghal an ni.

Thulaknain a tarlan danin, tunlai hian Assam lamah auto rickshaw leh two wheerler rukbo tam hle a, heng lirthei rubo tute hian Lawngtlai kaltlangin Myanmar lamah hralh an tum thin ni a hriat a nih vangin Assam Police-ten a theih ang angin an chhuizui a ni.

Tun tuma auto rickshaw an ruk pawh hi Lawngtlaiah hian Patharkandi Police-te chuan an rawn umzui a ni.

AOC Veng Branch YLA-ten lirthei an man thu hi Lawngtlai Police leh Magistrate lam pawhin an hriat veleh helai hmun hi an thleng ve nghal a, tihfel ngaite Patharkandi Police-te nen an tifel nghal a ni.

AOC Veng branch YLA-te’n auto rickshaw pathum an lo man bakah hian Lawngtlai District pawn lama man pali nen vawiin hian Assam lamah phurhthlak an ni.