Vande Mataram sak luihtir duh lo

MPCC chuan vawiin (27.8.2026) chhun khan Aizawl Press Club-ah press conference neiin, Congress Working Committee (CWC) chu August 19, 2026 khan Indira Bhavan, New Delhi-ah inhmukhawmin, BJP Sawrkarin Vande Mataram, India mipui sak luih tir an tum chu ngun taka an ngaihtuah hnuah kum 1937 a CWC in an lo rel tawh angin hla chang 1 na leh 2 na chauh hi sak nise tiin thluthlukna an siam tih an sawi.

MPCC President Lal Thanzara chuan CWC-in thutlukna an siam chhan hi a chang 1 na leh chang 2 na hi ram hmangaihna thu leh hla a nih thu sawiin, “A chang dang erawh hi chu Hindu sakhua Durga leh Lakshmi biakna leh fakna thu a nih avangin sakhaw dang betu leh ringtute tan sak a rem ve loh vang a ni. MPCC chuan kan ram kan hnam kan sakhua a him zel theih nan Vande Mataram a vaia sak luih tir tumna hi kan do zel dawn. India hi sakhua zalenna ram a nia, pangpar huan pakhata pangpar hrang hrang mawi taka an par za angin, mipuite pawh chi, hnam leh sakhua inthliarna awm lova zalen taka khawsa tlang ho tur kan ni. Foreign Contribution (Regulation) Amendment Bill, 2026 in a tum ber hi chu ram pawn atanga tanpuina hmanga minority leh Christian-ten India ram mipuite tana lo din school, college, hospital leh charity home chhuanlam chi hrang hrang hmanga tihtawp leh chhuhsak tumna a ni a, a bill-ah chiang takin a in ziak a ni,” a ti.

FCRA Bill chu kohhran mipui tawngtaina leh dodalna a nasat avangin BJP Sawrkar chuan Joint Parliamentary Committee (JPC) ngaihtuah atan a pe tih sawiin MPCC President chuan, “He JPC member-te hi a tam zawk BJP mi leh sa an nih dawn a vangin Congress Party chuan tha kan ti loa, ngaihthatna tur a awm kan hre lo. MPCC chuan FCRA Bill 2026 duh loh lantir nan July 21, 2026 khan Black Day kan lo hmang tawh bawk a ni,” tiin Congress Party chuan he bill hi Parliament-ah pass a nih loh nan hma lain, an do zel dawn thu a sawi.

Lal Thanzara chuan India kut hnathawk tute chawikan nana Congress Sawrkarin an lo din tawh MGNREGA chu BJP Sawrkarin VB-G RAM G in an thlak tih sawiin, “Mi harsa zawk tam tak ten inhlawh fak nan an hman thin kha tunah hi chuan thla tam tak an hnathawh hlawh pawh hmu thei loin an awm a ni. An inhlawh theihna ni zat pawh a hma aiin a tlem ta sawt a, VB-G RAM G hi hlawhtling lo tura duan sa a ni, a chhan chu VB-G RAM G Act ah hian mipuiin thu neihna a nei tawh lova Central Sawrkarin fund allocation ah hian duhsak zawng leh duhsak loh state neihtheihna thuneihna sang tak a nei a ni,” a ti.

MPCC President chuan MGNREGA-ah chuan mipuiin thuneihna sang tak neiin an mamawh angin sawrkarin inhlawhna a siam sak thin tih sawiin, “Thleibik nei lovin Central Sawrkarin za a za a tum thin a ni. VB-G RAM G ah erawh hi chuan 40% state lian in a tum anga, keini state tenau ho chuan 10% kan tum a ngai thung a ni. Mipui atanga chhiah pung a sum leh pai zawng ringawt sawrkar tan chuan kut hnathawktute hlawh tur 10% tum reng hi chu a harsa dawn a ni. Kut hnathawktute tana a that lohzia kan hriat chian em avangin Congress Party chuan hemi VB-G RAM G hi kan duh lo,” tiin Pathian leh mipui zara a sawrkar leh a nih chuan MGNREGA din that leh an tum thu a sawi.