Union Minister hnenah thehlut

New Delhi-a cham mek Minister of State Lalnghinglova Hmar chuan nimin (8.9.2026) khan Union Minister of Labour & Employment & Sports Dr. Mansukh Mandaviya chu New Delhi-a a chenna inah a kawm.

LESDE Minister Lalnghinglova Hmar chuan Mizoramah labour-te hamthatna tur zawnga sorkar laipui rawtna chak taka bawhzui a nih mek dan te, Mizoram Building and Other Construction Workers Welfare Board-a inziak lut an pun chak dan leh an hamṭhatna tura ruahmanna thar siam a nih dante Union Labour Minister hi a hrilh.

LESDE Minister chuan tun hnaiah nasa takin Employees’ State Insurance Corporation (ESIC) hnuaiah registration a pun thu leh, hmuh theiha hmasawnna a awm thu hrilhin, “Mihring cheng kan tlem avangin ESIC Hospital din tura tehnaah Mizoram tan tlin a harsa a, a mihring inziak lutin kan tlin chiah lo chung hian kan hmasawnna enin ESIC Hospital din dan min ngaihtuahsak rawh,” tiin a ngen.

Union Labour Minister Dr. Mansukh chuan LESDE Minister ngenna hi tihhlawhtlin a tum thu leh ESIC meeting awm leh hunah hospital pek tum a nih thuin a lo chhang a, Mizorama labour welfare chungchanga hmalakna leh hmasawnna chu Delhi aṭanga an lo hriat thute a sawi bawk.

Sports Minister ni bawk Lalnghinglova Hmar chuan Khelo India hnuaia sorkar laipuiin sum ṭhahnem zawk a neih tak avanga Mizorama sports infrastructure dinna tura ruahmanna siamte Union Sports Minister hnenah hian a thehlut nghal a, Khelo India fund hman theih a nih hunah Mizoram chu ngaih pawimawh hmasak zingah an telh dawn tih Union Sports Minister chuan a lo hrilh a ni.