News

Nimin (28.8.2016) tlai khan UD&PA Minister K Sapdanga chuan Aizawl Smart City Ltd hnuaia cheng vbc 14.33 senga sak Chaltlang Multipurpose Sports Complex DIET, Aizawl (CMSCDA) a hawng a, Aizawl Smart City Ltd chu a tawp dawn tak avangin a thlaktu tur Mizoram Urban Development Agency (MUDAL) an dinthu a sawi.

Smart City Ltd chu tawp mai tur a nih tawh thu sawiin K Sapdanga chuan, “Project thar chhuanawm tak dang pakha, Mizoram State Museum chu September chhunga hawn leh theih beisei a ni. Chu bak chu Aizawl Smart City Ltd a awm chhung chuan hawn tur kan nei tawh lo ang,” a ti a, Smart City Ltd chu sorkarin a ui takzet avang leh a tawp dawn tak si avangin a thlakna tur an ngaihtuah thu a sawi.

UD&PA Minister chuan Smart City thlaktu tur leh a hmachhawp chhunzawmtu tur MUDAL an din thu sawiin, “A thawktu tur la turin kan inbuatsaih mek a, September chhunga zawh hman tum a ni. October atang chuan bung nghal thei tura beisei an ni. MUDAL hian Smart City hmachhawp project pawimawh leh chhuanawm tak tura beiseite an thawk chhunzawm dawn a ni,” a ti.

MUDAL hian bawlhhlawh tawihthei lo sawngbawlna hmun tur Mateial Recovery Facility leh mi sang chuang eizawnna atana hman tur City Centre rei lo teah peih hman an tum dawn tih sawiin UDPA Minister chuan, “Hengte bakah hian khelhmual pahnih leh motor parking turte an la chhunzawm dawn,” a ti a, SASCI hnuaia project lian leh pawimawh, Aizawl rotling tur paruk pawh MUDAL-in an enkawl dawn thu a sawi.

K Sapdanga chuan CMSCDA atangin India rama champion, a aia sangt pawh an beisei dawn tih sawiin, “Chutihrualin, tunlaia kan buaipui em em drugs addict-te’n damna hmun atan hmang se, a siam tawhte tan hmun nuam nise kan duh. A tak hmu lotu tan chuan awihawm loh khawpin Mizo \halai drugs addict an tam. Hengte chhan chhuah leh a la ti lohte’n an tih lohna atan hmalak hi kan ngai pawimawh,” a ti.

Complex hawn inkhawm hi UD&PA Secretary V Lalsangliana’n kaihruaiin, Education Minister Dr. Vanlalthlana pawh a tel a, Aizawl Smart City Ltd CEO CC Lalchhuangkima chuan CMCSDA hi a neitu tur CMSCDA Management Committee hnenah a hlan nghal. CMSCDA Management Committee-ah hian Chaltlang khawtlang hruaitute, SCERT leh DIET hotute an tel. Chaltlang, SCERT leh DIET infawm tur niin, a hman dan tur chu CMSCDA Management Committee kutah a awm.

CMCSDA ah hi November 30, 2022 atanga sak tan niin, August 20, 2026 ah sak zawh a ni. A chung berah basketball court cum volleyball court, gym room leh media room a awm a, a sir kualah mi 1,000 len theihna a awm. Mipui punkhawmna atana hman a nih dawn a court-a phah tur ruahman nghal a ni. A hnuaiah boxing ring pakhat leh table tennis pahnih a awm a, mi 48 thut theihnaa awm tel. Floor panica hian inthiarna leh dressing room pahnih a awm ve ve.

A hnuai ber leh a dawttuah khum 12 ve ve awmna mipa leh hmeichhia dormitory bakah, zun in, dinning room leh choka a awm ve ve ve a ni. CMSCDA chawm thei tur 25Kva general an dah nghal.