Thenzawl Peace City master plan

Vawiin (17.10.2025) tlai khan Chief Minister Lalduhoma chuan Thenzawl Peace City Master Plan siam tura thlan IPE Global thuneitute chu a office-ah a kawm a, an hmalak tawhnate enpuiin, peace city tana sorkar hmathlirte a hrilh. Chief Minister hi UD&PA K. Sapdanga’n a tawiawm.

Chief Minister chuan, Thenzawl Peace City chu Mizorama plan city hmasa ber leh a awm chhun a ni dawn tih sawiin, ‘Khawpui changkang leh mawi tak, khualzinte tlawh nasat khua ni khawpa duan kan duh a ni,’ a ti a, master plan-a an tihtel a tana a ngaihpawimawhte a hrilh.

Lalduhoma chuan tha tak leh chak taka thawk turin IPE Global-te hi hrilhin, ‘A tul dan a zirin State Project Monitoring Committee-in an vil dawn,’ a ti.

Sorkar thuchhuah tarlan danin, Thenzawl Peace City master plan siam hna thawh chungchang pre bid queries rawn ngaihventu company lian tak tak 18 an awm.

Tender tihchhuah a nih hnuah uluk takin a chhangtute hi endik an ni. Ram 100 aia tama hetiang lam lo thawk tawh, ram hrang hrang pangaa office nei, India ramah pawh office hmun 20 a nei mek, India hmun hrang hranga city master plan lo siam tawh thin, IPE Global hi thlan an ni ta a ni.

IPE Global hi Inremna hi ziahpui an ni tawh a, inremna ziah atanga hapta thum chhungin Mizoramah office an rawn hawng ang a, an hna an tan nghal dawn a ni.

IPE team hi an Senior Development Expert Anil Bansal leh a thawhpui expert dangte an lokal.