State Museum-ah dah dawn

Nimin (30.03.2026) tlai khan Lamka Branch YMA, Manipur hruaitute chuan Mizo comics bu lar, Sudden Muanga ziaktu Lalsangzuala bungraw hlui, Sudden Muanga comics a ziah thinna hmanruate leh Sudden Muanga bu hlui eng emaw zatte chu State Museum-a dah turin Central YMA hnenah an hlan.

Bungraw hlui inhlanna hun hi Prof. Malsawmliana, General Secretar, Central YMA-in kaihruaiin “Sudden Muanga thawnthu kha a hun laia Mizo comics-ah chuan a lar ber leh a chuah hlan an nghahhlelh thin, thawnthu awmze nei leh darh zau a ni a. Mizo literature ah hmun pawimawh tak luahtu a ni,” tiin Lalsangzuala chhungten Mizo mipui tam zawkin a sulhnu an hmuh theihna tura langsar zawka pho chhuah an remti leh Central YMA kuta an hlan chu lawmawm a tih thu a sawi.

Lamka Branch YMA President F. Lalhmingmawia’n Lalsangzuala sulhnute hi a bo thlau nasa tawh tih sawiin, “Sudden Muanga Bu pawh a kim lo nasa tawh a, neih kim leh dan awm se kan duh hle,” a ti a, Central YMA General Secretary kutah heng bungruate hi a hlan a ni.

Central YMA hian hun remchangah Mizoram State Museum ah heng bungruate hi an hlan leh dawn a ni.