State Day chibai bukna

MNF President Zoramthanga, Ex. CM chuan vawiin State Day pualin a hnuaia tarlan ang hian chibai bukna a ti chhuak.

Zoramthanga chibai bukna :

Vawiin February ni 20, 2026 hi Mizoram-in India Danpui hnuaiah State anga a inrelbawlna Ni champha vawi 39-na a ni a. Kum 1987 February ni 20 khan Mizoram chu Union Territory aṭangin dinhmun sang zawkah India ram State 23-na ni tura hlankai a ni.

Mizoram State Day ah hian Mizoram State lo pian chhuahna kalkawnga kan theihnghilh tawh ngai loh tur, kan ram leh hnam tana nunna hlu tak hlantute leh an theihna zawng zawng hlantute zahna chibai kan buk thar leh a che u.

Mizoram State lo pianchhuahna hi MNF leh India Sorkar Inremna Thuthlung rah a ni a. Kum 1986 June ni 30 khan India Sorkar leh MNF chuan Inremna Thuthlung (Peace Accord) kan sign a. He inremnaah hian India ram aiawhin Union Home Secretary, R.D. Pradhan-in a sign a, Zoram mipui zawng zawng aiawhin Chief Secretary, Pu Lalkhama’n a sign a. Ramhnuai leh ram chhunga MNF zawng zawngte aiawhin Pu Laldenga’n a sign bawk. Pu Lal Thanhawla, khatih laia Chief Minister pawh khan remna atan hian a thawh hlawk hle. Chuvangin he remnaah hian tumah ral bang bik awm lovin, kan zavaiin kan tel a, a humhim pawh kan zavaia mawhphurhna a ni.

Peace Accord hlawhtling ber zinga mi kan neih theihna kawngah Mizo mipui zawng zawngte, Kohhran te, Zirlai te, Sorkar hnathawkte leh Mizo National Front( MNF) te kan tel vek a. Chuvangin Mizoram State Day hi Mizoram chhunga chengte tan mai bakah hmun hrang hranga cheng Mizo mipui zawng zawngte tan a hlu em em a ni.

Midangte State neih aiin Mizoramin State kan neih dan a changtlung zawk a, a nghet zawk bawk a. Mizoram State chhunga chengte chuan state dangte neih ang kan neih vek piah lamah humhimtu ILP, Inremna Thuthlung (Peace Accord) leh India Danpui chhunga mi – India Danpui lak aṭang pawha invenna; Mizoram tan bika Special Provision chuanna Arcticle 371(G) kan nei leh zel bawk a ni.

India ram tana Republic Day leh Independence Day a hlut ang tluk zetin Mizote tan Mizoram State Day hi a hlu a; a hlutna hre rengin he Ni hi hmang reng thei ila a duhawm hle mai. Chuvangin vawiin Mizoram State Day vawi 39-na hi a hlutna hre thar leh chungin hlim leh lawm taka hmang turin Mizo mipui zawng zawngte duhsakna ka hlan a che u.