State capital sawn tumah CM puh

MNF chuan vawiin (23.3.2026) chhun khan an office-ah chhung inkhawm an hmang a, thusawitu MNF Adviser Rober Romawia Royte chuan state capital Aizawl atanga Thenzawla sawn tumah Chief Minister Lalduhoma a puh a, CM leh a naute’n dawt an sawi nasa hle niin a sawi.

Robert Romawia chuan Chief Minister Lalduhoma hian ama bial Thenzawla Aizawl state capital sawn rawtna Central Sorkarah ziakin a submit ngei tih sawiin, “Sum pawh dilin an hmu. Mizoram capital Thenzawla sawn hi Aizawl mipuite hian an duhin ka ring lo. Chu mai a ni lo, ZPM MLA pakhat phei Assembly Session-ah
Aizawlah eng thil thar mah awm tawh lo se a duh thu a sawi a nih kha. Hetianga Aizawl dah pawnlang leh ngai pawimawh lo hi AMC-ah sorkar tir chi an ni lo,” a ti.

ZPM awm hma chuan session-ah House Leader, ministers leh MLA-ten dawt sawi an hlau hle nia sawiin Robert Romawia chuan, “Dawt sawi hriat tur a vang. Tun sorkarah chuan dawt sawi a tam em em mai a, an din lai ngeia tihdikna lo siam ngaite pawh a awm hial a ni. CM leh a naute hian Assembly Session pawh zah zo lovin dawt an sawi nasa hle,” tiin ruling MLA ṭhekhat pawhin an CM dawt sawi nasa lutuk chu hreawm an tih thu an sawi hial niin a sawi.