News

Election Commission of India (ECI)-a Deputy Director (Media) Apurva Kumar Singh chuan vawiin (4.6.2026) hian Aizawl Press Club-ah thuthar thehdarhtute a kawm a, Special Intensive Revision (SIR) 2026 chungchang leh a kalphungte a sawi fiah.

Apurva Kumar Singh chuan SIR 2026 hi India ram pum huap electoral roll ennawnna leh siamthatna hna pawimawh tak a nih thu sawiin, “Electoral roll dik, felfai leh rintlak siam tumna beihpui a ni. He hna hi ram pum huapin phase hrang hrangin kalpui a ni a, izoram chu phase III-na ah telin, state dangte rualin hmalakna hi kalpui mek a ni,” a ti.

Mizoram-ah Enumeration Phase chu May 30, 2026 atang khan tan a nih thu sawiin ECI Dy. Director chuan, “Booth Level Officer (BLO) te chuan in tinah kalin Enumeration Form sem, khawn khawm leh enfiahna hna an thawk mek,” tiin India khua leh tui, vote nei thei zawng zawng te electoral roll-ah an tel vek theih nan leh tumah hmaih palh an awm lohna tura tan lak mek a nih thu a sawi.

Apurva Kumar Singh chuan EECI-in SIR 2026 kalpui turin ram pum huapin field-level election official tam tak ruat an ni tih sawiin, “Mizoramah pawh BLO te, political party tin atanga ruat Booth Level Agent (BLA) te leh election official dangte chuan in tinah campaign leh mipuite tanpui hna an thawk mek. Hei hi India Constitution leh electoral roll siam dan tur danpui hrang hrang zawm chungin kalpui a ni,” a ti.

Media aiawhte zawhna hrang hrang chhangin, vote neih theih dan te, enrolment leh siamthat hna kalpui dan te, kumtling thar te E-Roll-a an inthun thar dan te leh SIR 2026-a political party te pawimawhzia chungchangte a sawi. SIR 2026 felfai taka kalpui turin mipui mimirah puanzar tam a pawimawh thu sawiin, media ten theihtawp chhuaha election official-te thawhpui turin a sawm a ni.