Serlui Bialtu MLA-in laptop a pe

Nimin (20.5.2026) khan Bilkhawthlir Community Hall-ah MZP Sub Hqrs buatsaihin Serlui Bial chhung atanga HSLC leh HSSLC a pass thar te lawmpuina hun hman a ni a, khuallian Bialtu MLA Lalrinsanga Ralte chuan Serlui Bial chhung sikul atanga HSLC leh HSSLC distinction-a pass thar zawng zawng mi 11 te hnenah lawmpuina atan laptop, citation leh lehkhabu a pe.

Lalrinsanga Ralte chuan a bial chhung zirna In atanga HSLC leh HSSLC result chhuaka mi enge maw zatin hlawhtlinna changa an pass thei chu lawmawm a tih thu leh a lawmpui thu sawiin “Zirna hi puitling a min siamtu a ni a, dinhmun tha a min din tir theitu chu zirna hi a ni. Hlawhtling tur chuan – tumruhna, inpumpekna leh mahni inthunun theihna te hi a pawimawh hle a ni,” a ti.

Serlui Bialtu MLA chuan, “Serlui Bial chhunga zirna in awmte hian hma sawnin zirnaah inelna duhawm tak thlen se; zirlaiten a rah duhawm tak seng se ka duh avangin Serlui Bial chhung zirna in atanga distinction a pass-te chauh laptop ka pe thin,” tiin laptop a pek chhan a sawifiah.