Feb 09, 2026
Monday
Mizoram Pradesh Congress Committee (MPCC) chuan chuan vawiin (9.2.2026) hian political session an hmang a, thusawitu AMC Corporator Rosiamngheta, MPCC Secretary chuan “Hnam anga kan invenna tur leh kan dam khawchhuahna tur kan ngaihtuah a ngai tawh hle” a ti.
Rosiamngheta chuan tunah hian sakhaw zalenna hnuaia kan awm avang hian secularism hi kan ngaihlu lo a ni mai theih thu sawiin, “Secularism hi India ram dan puia a awm theih nan India rama church father-ten hun rei tak chhung an nawr ngar ngar a, 42 Amendmnet ah Congress-in constitution-ah a thun ta a ni,” tiin tunah hian secularism hi a nghing tan a, India ram constitution atanga paih tumin BJP-ten hma an lak mek thu a sawi.
Tirhkoh Thoma kha AD 52 ah India a rawn thleng a, a martar thu sawiin MPCC Secretary chuan, “India hi India tia hming vuah a nih hmain Kristianna a rawn lut tawh a ni. BJP-te hian India hi an inti neitu em em a, Hindu leh Sindhu tih tawngkam hi Persia tawng a ni a, an tobul Mohenjodaro hi Pakistan-a awm a ni. BJP-te hian keini kristiante hi foreign sakhua min ti tawh suh se. Hindu pawh foreign sakhua tho a ni,” a ti.
Rosiamngheta chuan Congress tha ber an intih loh thu sawiin, “Mah se, kan innghahchhan hi Kristianna a ni a, a tir atangin Kristianten India thatna turin hna an thawk ngar ngar zawk a ni. Keini Mizo Kristiante hian kan hmakhua kan ngaihtuah a ngai tak zet zet ta. BJP te hian Pu Gandhi-a hming pawh nawhreh tumin hma an la ngar ngar tawh. An hotu thlak ve thin mah se, an ideology – Hindutva leh development hi an thlak ve ngai lo. Tunah hian Mizoram pawh min bei ngawrh dawn ta,” tiin Mizorama hman turin Budhist Circuit an rawn tih thu a sawi.
