News

Vawiin (9.2.2026) hian Railway Minister Ashwini Vaishnaw chuan Gauhati atangin Sairang leh Silchar inkar rel service thar leh Gauhati Rel Station-a Blended Hospitality Service a hawng.

Sairang Rel Station-ah he mi pual hian inkhawm buatsaih niin Chief Minister Lalduhoma, Minister of State Prof Lalnilawma, Minister of State B Lalchhanzova, leh Adviser to CM TBC Lalvenchhungate’n an telpui.

Chief Minister chuan Prime Minister Narendra Modi kaihhruaina hnuaia Act East hmalakna zarah Mizoram leh hmarchhak bialte chu ram hmasawnna lana hmun pawimawhah a chang chho mek tih sawiin, “Hmun kilkhawr zawka ngaih thinte chuan inkalpawhna tha zawk kan nei chho mek. Vawiina kan hawn thar Sairang leh Silchar rel service hi chung zinga pakhat chu a ni,” a ti.

Rel service thar hian Assam nena kan inpawhna a ti that lehzual dawn tih sawiin, “Sawhthing leh thlai dang kan tharchhuahte hralhna tur zau zawk min hawnsak ang a, kan flagship scheme Bana Kaih hi a ti chak dawn a ni,” tiin Sairang leh Silchar inkar rel tlantir tura a dilna a tihhlawhtlinsak avangin Railway Minister Ashwini Vaishnaw chungah lawmthu a sawi.

Sorkar thuchhuah tarlan danin, inkhawm neih zawhah Chief Minister hian a ngenna anga Sairang rel Station, World Class Rel Station-a siam tura tih fel tak design a en. Railways thawktute hian hnathawhna tur cheng vbc. 97 crore sanction a nih thute, tender an tihchhuah tawh thute leh tender hi thla thar March thlatir lama hawn an tum thu an hrilh a ni.