Saichal Lo Zawh Pui

Vawiin (11.9.2026) hian Saichal Lo Zawh Pui chu Zaupui, Saichal-ah hman a ni a, Tourism Minister Lalnghinglova Hmar chuan thlengin, Power Minister F Rodingliana chuan khuallian a ni.

F. Rodingliana chuan, “Lo neih hi Mizo mipuiten kan bansan dawn loa, kan culture-ah a bet tlat a ni. IAS pension pawhin huan tho an belbul leh thin a, chuvangin ZPM sorkar chuan tlangram lo kan neih dan nghet leh tlo zawk, hlawk bawk si a kut hnathawktuten an tharchhuah theih dan tur hi kan buaipui ber a ni a. Chutianga an tih theihna tur chuan lo neihna zau hrang hrangte pawh solar electric hmanga thlen chilh kan tum a, tunah hian zau 120 laiah hmalakna kalpui tum mek a ni,” a ti.

Lalnghinglova Hmar pawhin thu sawiin, “Lo zawh hi Mizo te Mizona lantirtu a ni a, tun hma atanga kan lo chin than tawh a nih laiin tun hnaiah mumal zawka hmang a, ceremonised kan duh a ni. Agriculture leh Tourism Department tangkawp chuan Agri-Tourism tiin hetiang buatsaih thei turin thawhdunna kan siam a, sawiseltu tak awm mahse kan chhunzawm zel dawn a, khawdangah kan ti zel ang. Saichal khaw mipui hlim hmel kan hmu a, hei hi in phu,” tiin lo zawh pui hi lo hlawkpui tura an duhthu a sawi.

Official programme hman zawh hian pawl thumah inthenin hlo thlovin lo zawh fel a ni a, hemi hnu hian Zau Pui Lo Zawh Concert neih chhunzawm a ni a, tlaiah mipuiten ruai an theh nghal. Agriculture leh Tourism Department official thahnem takin he lo zawh pui hi Aizawl atangin an hmanpui a ni.

Kum 2008 khan Saichal khua hian lo zawh pui an lo buatsaih tawh a, Saichal hi in 250 khua niin khawtlang mipuite eizawnna pui ber chu lo neih a ni.