RUSA assistant professor-te dah ngheh chhan sawifiah

Higher & Technical Education (H&TE) Minister Dr. Vanlalthlana chuan vawiin (22.5.2026) hian Aizawl Press Club-ah press conference koin Rashtriya Uchchatar Shiskha Abhiyan (RUSA) hnuaia assistant professor-te Council of Minister-in dah ngheh a remtih chhan a sawifiah a, “CSS Employee Regularisation Scheme-in a huam ve lo,” a ti.

Dr. Vanlalthlana chuan RUSA Faculty Recruitment Support Scheme hnuaiah college zirtirtu indaih lohna tihziaawmna atan kum 2017 khan RUSA PAB chuan permanent post 72 siam phalna Mizoram a rawn pek thu sawiin, “Ni 7.9.2018 khan Council of Minister meeting chuan a lo pawm sak a, ni 10.9.2018 leh ni 14.9.2018 khan chung post 72 siam leh hnawhkhah phalna chu tihchhuah a ni. Open advertisment hmangin MPSC-in RUSA hnuaia college zirtirtu tur mi 69 chu lak an ni,” tiin hna laknaah hian sorkar hnathawk nghet lak dan tur ang thlapa advertisment tih chhuah a nih thu a sawi.

H&TE Minister sawi dangte :

1.Ni 30.9.2019-a Council of Minister meeting chuan RUSA assistant professor-te hlawh chu chu Rs.70,000/- per month-ah a dah. An hlawh hi kum 2 chhung RUSA ațanga pek an ni ang a, chumi hnuah chuan state sorkarin an hlawh chu a tum sak tawh tura tih a ni.

2.Sorkar hmasain permanent post siamsak thlapa kum 2019-a MPSC kal tlanga a lak, kum 2 hnua sorkarin an service (liability) pawh lak huama a lo intiam tawh chu bawh zuiin RUSA hnuaia assistant professor-te dah ngeh phal chu ni 18.5.2026-a Council of Ministers meeting chuan a pawm ta a ni.

3.Kum 2021 ațang khan RUSA hnuaia assistant professor-te hlawh zawng zawng hi state sorkarin a pek tawh avangin CSS employee an ni tawh lo. State sorkar hnuaia hnathawk, an hlawh pawh state sorkar tum sak vek an ni tih hi mipuiten min loh hriatsak ka duh. State sorkar rawih liau liau an nih tawh avangin anni hi CSS Employee Regularisation Scheme-in a huam ve lo a ni.

4.Tuna hnaiah college assistant professor atan mi 31 lak thar an ni. Midang pathumin hna dang an thawh hman avangin RUSA assistant professor mi 58 lai dah ngheh an ni leh dawn ta. College lam hi indiah nghal viau tura ngaih theih a nih laiin tuna RUSA asst professor-te leh assistant professor kan lak thar mi 31 zinga mi hi contract leh part-time assistant professor atana kan chhawr lai mekte an nih avangin chuti thuta tha nghal kan ni lo a ni ti hi mipuiten min hriatsak nghal turin ka ngen a ni.