RTI Act hmanga diltu a lawm

RTI Act hmanga Mizoram State Health Care Society (MSHCS) leh Synod Hospital, Durtlang inremna diltu J Malsawmzuala Vanchhawng chuan Gauhati High Court (GHC), Aizawl Bench-in MUHCS chungchanga State Information Commission thupek siam chu dan zawm famkim loh a awm avangin a thiat a, mimal damdawi inte leh sorkar inremna langtlanga kalpui tura State Information Commission thutlukna siam erawh a nemnghet thung tih a tarlang, “Court thutlukna a lawmawm,” a ti.

J Malsawmzuala tarlan danin, High Court thutlukna kimchang hi nimin (19.8.2026) khan High Court website-ah dah chhuah a ni. MUHCS kalpuina tura inremna MoA chu sorkar sum hmanna, khua leh tuite damloh nikhuaa an inenkawlna tura duan anih avangin mipui tana thil pawimawh, public interest, langtlanga kalpui tur chi a ni tih court hian a sawi.

Puan zar a nih lohna tura sorkarin a tan chhan sumdawnna kaihhnawih thuruk leh inrintawnna hmanga inremna tih ang ang chi te, third party information tia sawi ang chi te aiin mipui tana thil pawimawh, ‘public interest’ anihna a chungnung zawk a, inremna puangzar tura State Information Commission-in thutlukna a lo siam tawh dan leh a siam chhante chu nemnghetin hemi chungchangah hian Court inrawlhna tur a awm lo a ni, a ti.

Hetihlai hian High Court hian third party-in sawi ve tur an neihte sawina hun pe loa information pe chhuak tura State Information Commission-in thutlukna siam leh, a thutlukna-a lungawi lohna neiten an thlenna tur hmun order a tarlang tel lote chuan ‘Dan hmanga enfiahna a paltlang zo lo a, Order dinglai chu thiah a ni’ a ti thung. State Information Commission chu dan ang taka ngaihtuah nawn leh a, thutlukna siam leh turin a ti a ni.

MUHCS kalpuina-a Mizoram sorkar leh Synod Hospital ten damlo enkawlna tura inremna an siam MoA leh detail pricing-te chu J. Malsawmzuala Vanchhawng, Advocate in RTI hmangin a dil a, Mizoram sorkar chuan private hospital-te nena an inremna-ah ‘thuruk anga vawn tur’ tih tarlan anih avangin pek theih a ni lo a ti.

J. Malsawmzuala Vanchhawng hi State Information Commission ah kal zelin, State Information Commission hian mipui tana thil pawimawh, public interest anih avangin inremna chu puanzar tur a ni a ti a. Hei hi Mizoram Sorkar chuan High Court ah a khing chhunzawm ve leh a ni.

J. Malsawmzuala Vanchhawng chuan court thutlukna chu lawmawm a tih thu a sawi a, MUHCS chu mipuite tana duan anih avang leh, damloten private hospital tinah engang hamthatna nge an dawn theih tih an hriat lawk chu an chanvo a nih avangin sorkar leh private hospital zawng zawngte inremna hi dil a nih thu a sawi.

Synod Hospital chungchang chu High Court thleng hmasa a nih thu sawiin J Malsawmzuala chuan, “Mizoram chhung leh pawna private hospital dangte leh Mizoram Ssorkar inremnate pawh a vaiin a dil tih sawiin, a dilnate hi thuneitute kutah a la inchiah mek. Court thutlukna chuan atir atang a tanna, ‘Mipui tana thil pawimawh, public interest a nih avangin puanzar tur a ni’ tih chu a rawn nemnghet nawn leh a ni,” a ti.