Jun 08, 2026
Monday
Vawiin (8.6.2026) hian Mizoram Secretariat, MINECO-ah “PALNA Anganwadi-cum-Crèche” chu Social Welfare & Women and Child Development Minister Lalrinpuii chuan a hawng.
Lalrinpuii chuan Secretariat-a hnathawktu nu leh pa, a bik takin hmeichhe hnathawkten rilru ngaihngam tak leh hna leh chhungkaw enkawl kawp dan tha zawk nei chunga sawrkar hna an thawh theih nan he hmun hi siam a nih thu sawiin, “Kum 6 hnuailam naupangte chu an taksa leh rilru nasa taka a than lai a nih avangin uluk taka enkawl an ngai a ni. He crèche kaltlang hian naupangte hriselna, ei leh in, leh an hmasawnna kawng hrang hrang chhinchhiah zui zel a ni dawn,” tiin he hmun hian nu hnathawktute phurrit a chhawk ngei a rin thu a sawi a, crèche-a thawktu zawng zawngte chu theihtawp chhuah turin a chah a ni.
He scheme hi kum 2022 aṭanga Ministry of Women & Child Development (MoWCD) chuan Mission Shakti (Women Empowerment) hnuaia hnathawktu hmeichhiate tana a rawn duan thar a ni. The Maternity Benefit Act, 2017 angin hnathawktu mi 50 aia tam awmna hmunah crèche facility neih ngei tur a nih angin, MoWCD operational guidelines zulzuiin he hmun hi kalpui a ni dawn. He hmun hi naupang kum 6 hnuailam enkawlna tura duan a ni a, anganwadi hnai ber nena thlunzawm a nih angin naupangten nutrition, health check-up, leh chaw tha an dawng vek ang.
