Aug 26, 2026
Wednesday
Aizawl East-II Bialtu MLA B Lalchhanzova, MoS chuan vawiin (26.8.2026) atangin a bial chhunga veng pasarih – Chite Veng, Armed Veng, Armed Veng South, Chhinga Veng, Tuithiang, Saron Veng leh Dawrpui Veng naupiang lawmpuina thawh ngana a sem tan.
B Lalchhanzova’n a bial chhunga December 2023 atanga naupiang lawmpuina a pekte chu mi 614 an tling tawh a, naupiangte hi Rs 1,000 leh thuziak a pe zel a ni. Vawiin atanga a thawh ngana atana a pek tur December 2015 to June 2026 chhunga naupiang lawmpuina 131 te nen chuan a hma a mite nen an vaiin mi 745 an ni ta. A thawh ngana atan naupiang 131 te lawmpuina hun bul tanna chu HJ Rodinga in, Armed Vengah tan a ni.
Tun dinhmuna Mizoram a nuten nau an neih mek dan chu nu pakhat zelin nau 1.87 hring ang an nih thu sawiin B Lalchhanzova chuan, “India ram pumpui pian dan 1.99 aiin kan hniam mek a, hnam ral lo tur chuan nu in nau 2.1 ang tal an hrin angai a ni. Pian pun kan mamawhzia chu hei hian a ti chiang hle. Pianpun mamawhmawh zia tarlan nan leh piang pung tura tan kan lakna chi khat atan hetianga naupiang lawmna thilpek hi buatsaih ka ni. Kan bial, Aizawl East-II hi sulsutu constituency pawimawh kan kan ni mek a ni,” a ti.
B Lalchhanzova chuan pianpun hi hnam anga kan vei ngai tak, sawrkar, kohhran leh tlawmngai pawlten thukhat vua a kan tan tlanna tur a nih thu sawiin, “Mizo hnam a ral loh nan pianpun indopui kan puan a ngai. Kan state chhung hi kan la thawl em em a, sq km khatah mi 52 chauh kan la chenga, India ram pumpuiah erawh chuan sq km khat zelah mihring 430 cheng ang kan ni. Pung zel turin ram kan la nei zau,” tiin tam ila Mizo hnam hi kan zahawm sauh sauh tur thu a sawi.
