Jul 26, 2026
Sunday
Social Welfare Department leh Mizoram Presbyterian Kohhran tangkawp vawiin (26.7.2026) tlai dar 3 khan Chanmari Kohhran Hall, Aizawlah Narcotics Awareness Campaign bul an tan a, Social Welfare Minister Lalrinpuii’n a hmanpui.
Lalrinpuii chuan Mizoram Sorkarin Hulhliap a buatsaih a hlawhtlin viau laiin kawng chi dang danga ruihhlo avanga harsatna tuarte puih dan tur sorkarin a ngaihtuah zel thu sawiin, “Hautak lutuk si lo system tangkai si neih a tul a, chumi atan chuan Narcotics Anonymous kalpui a tul a ni. After Care Skill Training lamah pawh Mizoramin Synod, BCM, ECM, LIKBK leh NGO te thawhpui dan tur duan mek a ni,” a ti.
Narcotics Awareness Campaign hi Aizawl leh a chhehvel a kohhran 27 ah neih chhoh tura ruahman a ni. SWD hnyaia MSD&RB leh Mizoram Drugs User Forum(MDUF) lam atangin resource person leh counsellor-ten hun an hmang thin dawn a ni.
Ruihhlo ngai chauh ni loin an chhungte pawh sawm tel an ni a, family sensitisation hun buatsaih tel nghal thin a ni ang.
