MPSC talbuai ber tum a thleng &#8211; MNYF

Mizo National Youth Front (MNYF) chuan thuchhuah siamin, ZPM-in sawrkârna an chan atangin Mizorama hnalatu sâng ber MPSC chuan buaina namen lo tawkin an talbuai nasat ber tum a thleng ta hial nia tarlangin, “MPSC chet fel loh avanga thalai hna zawngtu mi tam takin harsatna an tawkte; hemi avanga zirlai pawlte leh thalai hna zawngte’n MPSC Siamthat Hnatlang neia an thawhchhuah hial a lo ngai ta hi pawi kan ti hle. Hei hi a bul ber chu ZPM sawrkârin MPSC thuam chak tak tak chuang si lova MNF sawrkâr din MSSSB thiata, zawh loh nghawngkawl a bahtir vang niah kan ngai,” an ti.

Hetiang a nih reng laia, MPSC hnathawh leh kalphung en nawna siamthatu tur Reform Committee Chairman atâna ZPM sawrkârin eiruk thubuai nei tih hriat sa reng officer a ruat leh a thubuai avanga tun hnaia man a tawk ta hial mai pawi an tih thu tarlangin MNYF chuan, “A mawhphurtu ber Chief Minister Pu Lalduhoma chu thalai hna zawngtute hmakhua ngaihthahah kan ngai a, MPSC sawp chhiat vek hi pawi a ti lo em ni tih hi kan zawhna a ni,” tiin CM zawhna an zawt.

MPSC-in a zahawmna leh mipuite rin ngamna a hloh mêk hi MNF Thalaite chuan a pawi an tih thu tarlangin, “A mawphurtu ber Chief Minister Pu Lalduhoma leh a kaihhruai ZPM sawrkâr chu zirlai leh thalai hna zawngtute hmakhua ngaia, MPSC hi a rang thei ang bera tihtakzeta thuam chak tur leh siamtha(reform) turin kan phût a ni,” an ti.