News

MNF chuan thuchhuah siamin Mizoram mamawh chak lakluhna ber, kawng chhiat nasat lutuk avanga rang taka siamthat ngiata nuar mek, Kolasib District Drivers & Owner’s Joint Action Committee (KDDOJAC)te chu Mizoram Sawrkar chuan vauna chi tinrenga a vau hnuah, vawiin (23.10.2025) hian an man ta tih tarlangin, ‘Heng an mi mante hi thu delhkilh awm lova, a rang thei ang bera chhuah zalen turin Mizoram Sawrkar kan phut a ni,’ an ti.

ZPM Sawrkar chu kawng siam nan chhiah thahnem tak mipuiah khawn a, sawrkarna an chan atanga khawthat hun chhung zawnga kawng siamtha duh loa, mipui lungawi lo tam tak thawm a rik hnu, ruahtui nasa tak a tlak hnuah a siamthat hna a thawk tan ve chauhah puhin MNF chuan , ‘Kawng chhe vei ber anga lan tumin an Minister leh MLA ten lansarh khelin kawng siam an vil a ni. Rei vil peih loin, kawngchhe siam lahin hma a sawn mawh em em a, hei hi lirtheia eizawng driver leh motor neitute tan chuan manganna tawpkhawk a ni,’ tiin mipui mamawh lakluhna ber kawngchhia hi Mizoram sumdawng leh mipui zawng zawngte tan harsatna namen lo thlentu a nih thu an tarlang.

MNF chuan an chanvo ngiata kawngtha neih thuai phutin KDDOJAC-te chuan kawngpui danchah hna thawkin sawrkar an kar tih tarlangin, ‘Mizoram Sawrkar chuan fate lungawi lo chu tih lungawi tum aiin, a thuneihna changchawiin vau chi tinrengin a vau. Police tha chakna hmangin tan ina dah turin an mankhawm ta hi a pawi kan tiin, heng an mankhawmte harsatna leh phutte hi a rang theiang berin tihhlawhtlin sak se. An mankhawmte pawh hi a rang thei ang bera chhuah zalen kan phut. An thilphut tihlawhtling tura thlawp kawngah MNF chuan theihtawp chhuah a inhuam reng a ni,’ an ti.