MLA-in school uniform a sem

Aizawl West-II Bialtu MLA Lalnghinglova Hmar, Minister of State chuan vawiin (17.6.2026) hian a bial chhung Govt. Primary School, Dinthar leh Govt. Gairigaon Primary School-a zirlaite hnenah uniform pheikhawk Dinthar YMA Hall-ah a sem.

Lalnghinglova Hmar chuan, “Aizawl West-II a veng hrang hranga sorkar primary school-ah school uniform pheikhawk hi kan sem dawn a, kan bial chhunga sorkar primary school zirlai zawng zawngten an dawng vek ang. Sorkar school a lutte kan puihna tura sem kan ni a, kumtharah engtinnge kan inpuih leh theih ang tih pawh kan ngaihtuah leh dawn,” a ti.

Mizoram a zirtirtu tha berte awmna chu sorkar school a nih thu sawiin Lalnghinglova Hmar chuan, “Sorkar school-ah chuan trained teacher vek an awm. Nimahsela a pawl hniam lamah sorkar school-a in kaltir hrehna a awm thin,” tiin Aizawlah sorkar school-te hi luh nan a tha tawk a ni tih Aizawl West II atang hriattir an duhthu a sawi.

Aizawl West-II Bialtu MLA chuan an bial chhungah zirna tihhmasawn a tihlen zel a tum thu leh hma an sawn ve zel nia a hriat thu sawiin, “Dinthar Vengah sorkar sikul hmunhmain a zawh loh avangin zirlai pawh inlak theih loh chin a awm a, sikul tihchangtlun lamah pawh hmalak dan kan ngaihtuah ang,” a ti.

Bialtu MLA in school uniform pheikhawk a semnaah hian a thawhkhatnaah Dinthar Venga sorkar primary school pahnihte atangin zirlai 214 in pheikhawk an dawng a ni. Tunkar leh karleh tirlamah sem chhunzawm a ni dawn a, bial chhung primary school zirlai 673 hnenah pheikhawk hi pek turin an ruahman.