News

August 3, 2026 zan atanga chin hriat loa bo H Ramdinpuii (15) d/o H Lalawmpuia, Mualthuam North chu vawiin (5.8.2026) hian thiin hmuh a ni.

Thudawn danin, H Ramdinpuii hi August 3 zana an in atanga a chhuak chu chin hriat lohin a bo a, khawtlangin an zawng a ni. Vawiinah an thenawm khuate mibo zawng turin an thawk chhuak ve a, Mualthuam North lam chu ramhnuai lamah mibo zawng turin eng emaw zat an thawk chhuak a ni.

Mualthuam North khawtlang hruaitute chuan an khaw thenawm atanga thawk chhuakte hi khaw dai hnaia an zawnna tur an kawhhmuh a, anni ho hian dar 10:15 vel khan Govt. Middle School, Mualthuam North hnung lamah an hmu a ni.

Sikul hi khaw chhunga awm a ni a, khawtual mite chuan an hmuhna hmunah hian a hma pawhin an lo zawn tawh thu an sawi. An hmuhna hmun hi kawngpui chhak lawk a ni a, thingkungte a awmve nual.

H Ramdinpuii thih chhan hi hriat a la ni loa, he thuziah lai hian police nghah mek a ni.