Lalsavunga Park kal tur dang tan

Hlimen Local Council leh All NGOs bultumin vawiin (1.9.2026) atangin Hlimen huam chhunga awm Lalsavunga Park enkawltu (contractor) thlak phutin park-a kal tur dang tan a ni.

Hlimen atanga Bengvarna thudawn danin, park-a kal tumte chu thil awmzia an hrilh hnuah dan buai ngai loin an kar leh mai hlawm. Nizan lamah Rural Development & Administration Minister leh Bialtu MLA-in khawtlang hruaitute an bia a, khawtlang hruaitute hian an thil tum kaltlangpui an tum thu an lo hrlih. Vawiin lamah chuan sorkar thuneitute atangin thudawn an nei lo.

Hlimen LC leh All NGOs NGO hian nimin khan thuchhuah siamin, Lalsavunga Park-a kal turte an dan tur thu leh a chhan an lo tarlang tawh a ni.

AN THUCHHUAH :

Lalsavunga Park enkawl a nih dan chungchangah sorkara kan thil phûtte a hlawhtlin tak loh avangin, Hlimen Local Council leh All NGO’s joint meeting chuan kan lo rel tawhin angin, September 1, 2026 (Thawhlehni) atang hian Lalsavunga Park hi tlawh theih loin kan dang dawn a ni tih mipuite kan inhriattir e.

Lalsavunga Park enkawl dan chungchanga kan lungawi lohna hi August 11, 2026 khan press release kan lo tichhuak tawh a ni. Kha kan thuchhuah ang khan naktuk thawhlehni atang hian Lalsavunga Park hi tiamchin awm loin kan dang dawn.

Lalsavunga Park enkawltu (contractor) hi a contract cancel ngei ni rawh se tih hi khawtlang hruaitute leh mipuite duhdan a la ni reng a ni. Khawtlang mipuite leh park tlawh tumtute hriatthiamna kan rawn dil e.