Kum 2026-2027 budget tur a hriat ta

Chief Minister Lalduhoma chuan kum 2026-2027 atana Mizoram budget tur cheng vbc. 17,469.92 chu vawiin (26.2.2026) hian Assemblt House-ah a pharh. Sorkar kum kal mek (2025-2026) budget cheng vbc. 15,198.76 aiin cheng vbc. 2,271.16 (14.9%) in a tam zawk. Sorkar kum kal mek budget cheng vbc. 15,198.76 hi kum hmasa budget cheng vbc. 14,412.12 aiin cheng vbc. 786.64 in a tam zawk.

Kum 2026-2027 budget-ah hian sorkar hnathawk hlawh, pension hlawh, sorkar inrelbawlna, leiba rulhna etc. (revenue expenditure) tur chu cheng vbc 14,094.47 (82.53%) niin, hmasawnna hnathawhna tur (capital expenditure) chu cheng vbc. 2,982.44 (17.46) a ni thung. Kum 2025-26 budget 15,198.76 atang chuan revenue expenditure chu cheng vbc. 12,540.20 (82.51%) niin, capital expenditure chu cheng vbc. 2,658.56 (17.49%) a ni thung.

Sum hmuhna tur thenkhatte chu – state-in chhiah a hmuh State Own Tax Revenue (SOTR) cheng vbc. 1619.25, state-in chhiah ni chiah lo atanga sum a hmuh State Own Non Tax Revenue (SONTR) cheng vbc. 1140.50, Mizoramin sum a hmuhna hnar lian ber, central-a chhiah tlingkhawm state-in an insem ṭhin (devolution of central taxes & duties) atangin cheng vbc. 8,608.08, rural and urban local bodies grant 73, 59 urban, SDRF cheng vbc 51.3, CSS atangin vbc. 3320.15 leh External Aided Project atangin cheng vbc. 130.15.

Kum 2025-2026 budget-ah chuan state-in chhiah hrang hranga sum a hmuh, state own tax revenue (SOTR) aṭanga beisei chu cheng vbc. 1,478.26 niin, sorkar kum kal meka hmuh tura beisei chu cheng vbc. 1,312.42 a ni. Chhiah ni chiah lo aṭanga state-in sum a hmuh, state own non tax revenue (SONTR) aṭanga sum hmuh tura beisei chu cheng vbc. 1,138.07 niin, sorkar kum kal meka hmuh tura beisei zat chu cheng vbc. 1,122.39 a ni.

Kum 2025-2026 ah vek Mizoramin sum a hmuhna hnar lian ber, central-a chhiah tlingkhawm state-in an insem ṭhin (devolution of central taxes & duties) atangin cheng vbc. 7,112.23 hmuh beisei a ni.