K Vena’n Parliament-ah thu a sawi

Parliament Session neih mekah vawiin (12.2.2026) Rajya Sabha MP K. Vanlalvena chuan zero hour-ah thu sawiin, Mizorama kawngpui pawimawh pathum siam thuai a tul thu a au chhuahpui.

K Vanlalvena chuan Hnahthial atanga Myanmar ramri kawng pahnih, Hnahthial- Tarpho- Khawhri- Cherhlun- Thingsai- Bualpui H- Saisihchhuah kawngpui leh Hnahthial- Tuipui D- Darzo- S.Vanlaiphai- Sangau- Pangkhua- Saisihchhuah kawngpuite chu national highway (NH) a puang ve ve turin Sorkar Laipui a ngen a, “Kum 2020 ah Myanmar Sorkarin Chin State khawpui Hakha atanga India leh Myanmar ramri Saisihchhuah thlengin double lane kawngpui an sial zo tawh. India Sorkara Ministry of Commerce and Industry-in Saisihchhuah ah ramria insumdawn tawnna hmun tenau border haat a puang tawh chungin kawngpuiin a la pawh lo. He kawngpui hi sial tlanga NH-a puan an nih chuan Act Eat Policy tih hlawhtlinna atan te, ram venhimna atan te leh Mizorama tribal mipuite ei leh bara hma an sawnna atan te a tangkai dawn,” a ti.

Rajya Sabha MP chuan Sairang Rel Station hawn thar a nih atangin Aizawl leh Sairang inkar lirthei tlan zat a pun phah nasat thu pawh sawiin, tuna kawngpui awm mek NH No. 54 chu a zau tawk tawh loh thu leh a rang thei ang bera four lane kawngpuia siam a tul thu a thlen.