News

Vawiin (February 13, 2026) hi International Condom Day a ni a, hehe ni denchhen hian Mizoram State AIDS Control Society (MSACS) leh AIDS Healthcare Foundation (AHF) India Cares buatsaihin Dawrpui Multipurpose Hall, Aizawlah hun hman a ni. Kumin International Condom Day thupui atan hian ‘Just Use It’ tih hman a ni.

Khuallian, Health Minister Lalrinpuii chuan Mizoramah sex atanga HIV kai kan pung zel chu a ngaimawh thu leh hnam ang pawha mualphona a nih thu a sawi a, “World Health Organization (WHO) pawhin condom chu HIV leh sex atanga inkaichhawn theih natna darh zel tur venna awlsam leh tangkai ber pakhat a nih thu an tarlan angin, kan ramah pawh condom chungchanga kan ngaihdan leh rinthu dik lo kan neih thinte kan paihbo a, a hman dan tur leh a nihna ang taka condom hi hman a nih chuan HIV leh sex atanga inkaichhawn theih natna tam tak darh tur nasa taka kan ven theih ka beisei tlat,” a ti.

Mizoramah mahni kawppuite laka rinawm lo an tam chu pawi a tih thu sawiin Health Minister chuan, “Kan rinna nen pawh a inhmeh lo. Hei hi HIV kan rama darh zel nachhan lian tak pakhat a ni. HIV kaina tam ber chu sex atang a ni a, za a sawmsarih (70%) lai a ni. Mizoram future veng tur hian kan thalaite an pawimawh hle,” tiin thalaite nupui pasal neih hma a sex hmang lo tur leh a thei ngang lote chu condom hmang hreh lo turin a chah.

International Condom Day hmannaah Health Minister hian Love Brigade 2.0 Campaign a hawng. Love Brigade 2.0 Campaign hnuaiah hian two-wheeler taxi khalhtute hnenah Condom pai theihna tur Love Brigade Condom Jacket sem a ni.