News

Indian Oil Corporation Ltd. (IOCL) in eirawngbawlna gas bur an siam thar kgs. 10 bur Indane Xtralite Now chu Food Civil Supply & Consumer Affairs Minister B Lalchhanzova’n State Guest House, Aizawlah a tlangzarh.

IOCL hotute sawi danin, India ram hian LPG a mamawh 30%-35% chiah a siam chhuak a ni. A bak zawng hi ram dang atanga lakluh a ni a, Iran leh middle east ram dang atangin a lalut nasa a, hun rei tak chhung inremna a siampui a ni. Middle east buai hnuah LPG lakluh man a to zual. Mipui hnena domestic cylinder Rs. 950 vela an hralh lakluhna atan Rs. 2000 vel hman a ni a, hun ralmuan lai pawhin Rs. 1,600 vel sen a ni. PMY benificiary-te phei chu 300 subsidy an la nizui.

Tin, danah chuan chhungkaw pakhatin gas bur khat bak neih a thiang lo. Chutihlaiin, pakhat aia tam nei thahnem tak an awm. Miin, gas a hman zawhin book theih hun chhung a awm a, chungah chuan mi tam takin a black-in to tak takin an lei thin. Indane Xtralite Now hi awlsam a, ID proof, address proof leh domestic connection document ngai loin, new connection leh book refills duh tan IndianOil ONE App leh IndianOil Customer website-ah tih theih a ni a, Whatsapp hmanga book na pawh tih thuai tum a ni.

Indane Xtralite Now hi a bur plastic a ni a, himna lama ngaihtuah awm a ni lo. A bur hi kgs. 6 vel lek niin, gas thun hnuah kgs. 16 vel a ni. Domestic cylinder kan tih hi chu kgs. 14.2 tih a ni a, a bur nen chuan kgs. 30 vel a ni a, leklam a inawlsam hlei a ni. Tin, eng chhin nge hman a nih tawh tih a bur atangin a hmuh theih vek. Duh hun hunah book theih a ni.

Book a nih atanga darkar 3 chhungin a book tute hnenah deliver tur a ni a, a man erawh domestic cylinder aiin a to deuh. Aizawlah a vawi khatnaah a bur nen Rs. 4,900 man a ni a, a hnuah chuan bur khat Rs. 1,800 zel a ni tawh dawn. Indane Xtralite Now hian domestic cylinder khaihlak changa mi tam takin man to tak taka a black-a gas an lei thin chu a tihreh theih an beiei.