Sep 06, 2026
Sunday
Tun thla (September, 2026) atang hian Lawngtlai khawpui chhungah raltlan leh ramdangmite’n in an luah remtih a ni tawh lo.
August 31, 2026 a Lawngtlai Bawrhsap hoa dan leh thupek kenkawh chungchang thlira thukhawm chuan ramdangmi leh raltlan chungchang ngaihtuah telin, ram mipuite himna leh dan tha taka zawm a nih theih nan ramdangmi leh raltlante chu Lawngtlai khawpui chhungah in an luah remtih loh nise, an ti a ni.
In luah remtih loh chungchang hi DC, Village Council, Young Lai Association leh Police tanghoin hmalakna kalpui tur a tih a ni.
Veng tinah ramdangmi leh raltlan lut leh chhuak chhinchhiahna mumal tak neih tha an ti a, a bikin raltlante zingah inhlawhfa an awm thin a, inhlawh duhte chu an dinhmun ngun taka thlir chungin khawtlang hruaituten hnathawh remtihna (work permit) pe chhuak thin se, tih a ni.
Tun dinhmunah Mizoram Sorkarin a chhinchhiah danin Lawngtlai District-ah raltlan 7,425 awm mekin, heng zinga 6,064 chu Myanmar atanga rawnlut niin 1361 chu Bangladesh atanga lut an ni.
