Homestay 199 sak a ni dawn

Nimin (3.9.2026) khan Tourism Deparment buatsaihin BSI Hall, Bible House-ah Empowering Community Homestays Ceremonial Launch & Capacity Building (Under BANA KAIH, PM-JUGA and CSR Initiatives) Programme hman a ni a, Tourism Minister Pu Lalnghinglova Hmar chuan khuallian niin hun a hmanpui a,
homestays 199 sakna tur a tlangzarh nghal.

Tourism Minister chuan sawrkarin tourist lodge sak belh a tum tawh lo tih sawiin, “A awmsa erawh tha taka thawmthat a tum. Sawrkar chuan homestay promote a tum a, sumdawn a tum loa, mipuite sumdawn tira, a ham thatna dawn tir hi a tum zawk a ni. Homestay hi hausakna tur khawp a ni lo mai thei, mahse eizawnna tlak chu a ni dawn a ni. Tourism kan sawi hian rilru hian State pawn lam mi hi a ngaihtuah nghal thin a, mahse Great Wall of China hi a tlawhtu 90% chu Chinese, nikuma Taj Mahal tlawhtu 90.7% khan India mi, Horn Bill Festival hi kum 26 an lo kal pui tawh a, a chhimtu 75% hi anmahni Naga tho a ni. Chuvangin thlenna tur homestay a awm chuan keini Mizo ram chhung pawh hi kan la inthlawhpawh nasa dawn,” a ti.

Mizoram chhungah homestay 199 sak a ni dawn. Heng homestay 199 atanga 100 sakna tur sum (₹540.75 lakhs) chu Mizoram Flagship Programme Bana Kaih atangin hmuh a ni. He Bana Kaih Homestay hian MLA constituency 40 a huam ang. Homestay din tura thlante hi Progress Partner tih an ni a, sum hi October thla-ah release tan tur a ni. Sum hi installment hnihin (80:20) in an release ang. Bank account-ah transfer tur a ni. Sum dawn kim atanga thla 3 chhungin homestay hi operate hman tur a ni.- Homestay design thlan tur Tourism Department-in a siam ang.

Homestay 89 sakna tur sum (₹500 lakhs) chu PM-JUGA hi DA-JGUA scheme atanga hmuh a ni. Hei hi tribal homestay scheme a ni. Mizoramah cluster hnih (central cluster leh southern cluster) atan sum hi dawn a ni. Khaw 12 a huam ang. Homestay siam tura thlan chhuahte hi beneficiary tih an ni. Sum hi October atangin release tan tur a ni. Sum hi bank account ah transfer tur niin, central guideline angin installment thumin an release ang (50:40:10). Sum dawn kim atanga thla 3 chhungin homestay hi operate hman tur a ni.

Homestay dang 10 sakna tur sum (₹49.96lakhs) chu IIndian Railway Finance Corporation Ltd) te CSR( Corporate Social Responbility) atangin dawn a ni. Thenzawl leh Serchhipah te sak an ni ang. Hemi hnuaia homestay bik hi MTDA-in a enkawl ang. Fund hi installment thumin (40:50:10) in an release tur a ni.