Gas harsat chhan sawifiah

Mizoram Indane Distributors Association (MIDA) chuan thuchhuah siamin, eirawngbawlna gas harsat chhan an sawifiah a, ‘Krismas leh Kumthar-ah pawh gas hnianghar a hmuh a beisei awm ta lo,’ an ti.

MIDA chuan kumin June thla atanga vawiin ni thlengin rampumah eirawngbawlna gas a thleng tha lo tih tarlangin, ‘A chhan chu NH 306 huam chhung Sairang leh Kawnpui inkar kawng a chhiat vang a ni. Kawngpui hian that lam aiin chhiat lam a la pan chho zel a tun dinhmunah a LPG truck-te hi ni 4,5 te an la thang thin, kawngpui chhiat avang hian LPG truck an thang rei a chu chuan LPG Bottling Plant lamah LPG truck indaih lohna a thlen thin,’ tiin LPG Bottling Plant-in load pek duh mah se, LPG truck awm loh chang a awm thin thu an tarlang.

Tunah hian mipuiah gas indaih lohna, harsatna a thleng chho mek tih tarlangin MIDA chuan, ‘Heng harsatnate hi thuneitute hnenah thlen a ni tawh chungin ngaihsak a hlawh loin hmasawnna a awm lo hle. Hetiang reng a kan kal zel chuan kan hunpuiah lo thleng tur Krismas leh kumtharah pawh gas hnianghar a hmuh a beisei awm ta lo. Chuvangin, mipuite hriatthiamna kan ngen rualin, kan sawrkar hian kan kawngpui hi siam tha vat turin kan ngen a ni,’ an ti.