Foreign runner tha an rawn thleng

Aizawl International Half Marathon chuan ngaihven a hlawh chho a, India bakah India ram pawn aṭangin runner ṭha an lo thleng mek – nimin (February 12) khan eng emaw zatin Aizawl an lo thleng.

Organiser lam aṭanga thu kan dawn danin, foreigner tana Mizoram lut tura Protected Area Permit ngai avangin foreigner thenkhatin harsatna an tawk a, nimin khan Sports Department, Home Department, Tourism Department bakah SIB hotuten an buaipui a, harsatna awm angte chinfel thawkhat a ni tawh.

Half Marathon (21.1 km) tlan tur bik hian professional runner eng emaw zat an inziak lut a, Africa, Europe leh Asia khawmualpui ram dang aṭangin mi 20 chuang an inziak lut tawh a, nimin khan mi pali lo thleng tawhin midang chu vawiin hian an lo thleng ang.

Vawiin, February 13 hian Lammualah registration a la tih theih a, 10 km (mipa leh hmeichhia), 5 km (mipa leh hmeichhia), 5 km Senior (Kum 60 chung lam), 5 km Junior (Kum 10-15 inkar mipa leh hmeichhia a la inziah luh theih.

21.1 km bik erawh ziah luh hun a tawp tawh a, tlan turte hi microchip vuaha GPS tracker nena endik vek tur an nih avangin a hun hi khar a ni tawh.
February 14 zing dar 6-ah Rajiv Gandhi Stadium aṭanga tlan ṭan tur a ni.