News

Nimin (7.9.2026) khan ZPM chuan party office-ah chhung inkhawm hun kan hmang a, thusawitu Adviser to Chief Minister (Implementation of Handholding Policy)
Dr. KC Lalmalsawmzauva, chuan ZPM chu policy bawhzui kawngah first class-ah an passed thu leh Chief Minister Special Package chu a thlawna sum sem ringawt a nih loh thu a sawi.

Adviser to CM chuan mipuite support-na, sawrkar hnathawkte thawhrimna, party worker fin chhuahna leh kohhranhote tawngtaisakna zarah ZPM kaihhruai mipui sawrkar, kum 2 leh thla 9 a upa chu policy umzui kawngah first class-ah an passed tih sawiin, “He hun rei lote chhung hian kan policy pawimawh tak tak 70% vel kan bawhzui hman der. Hetiang ang sawrkar hi a la awm ngai lo. Heng hi keimahni theihna ringawt ni loin Pathian malsawmna kan chan a ni, chapo tur kan ni lo. Mihring kan ni a, tih fuh tawk loh leh fel tawk lohna tam tak kan nei. Policy a kan lo dah, constitution-a kan lo dah tawh, a tak chan tir dawna theih loh leh tha lo zawk te pawh thil awm thei a ni, kan chhiatpui kher nghak loin a siamtu kan nih angin a ti danglam theitu kan ni. India constitution pawh vawi 106 siam that a ni tawh; USA vawi 27 leh Germany vawi 60. Kan hun tawn mil zelin tun chauh lo pawh hi kan la amend zel a ngai dawn tih hi pawm ang u. Mipui sawrkar kan ni tih kan theihnghilh palh a hlauhawm. Kum 2028 ah kan sawrkar leh a ngai, hmachhawp a tam lutuk. Keinin kan siam that loh chuan Zoram hian tunge beisei tur a neih? Kan tih theih sang ber chu mahni theuh insiamthat a, midangte nena thawhho thiam hi a ni,” a ti.

CM Special Package chungchang sawiin Dr. KC Lalmalsawmzauva chuan, “CM Special Package hi a thlawna sum sem ringawt a ni lo, project based a ni. Uluk takin implementing department leh district monitoring team ten an rawn umzui dawn. Keini ho zingah hian ti tak tak lo kan lo awm palh a nih chuan a mualpho thlak hle ang. August 2026 thlenga CM Special Package Phase I leh Phase II hnuaia progress partner puih tawh zat chu 3,842 an ni a, hemi atan hian Rs. 26,25,95,870 (vbc. 26.2/-) sen a ni tawh a ni. Tun thla September ni 18 hian Chief minister hovin Banakaih Phase-3 khuhhawnna nei turin kan inbuatsaih leh mek a, siamrem hlek hlek kan nei dawn a, kan lo ngaihven dawn nia. Dilna kan submit vek sia kan va hmu ve lo ve, kan va hmu har ve, tih zawhna kan dawng tam hle. A chhanna chu Dilna kha department lamah thawn zel a ni. Department-ah a changtu Minister hoin Departmental Nodal Committee (DNC) in an lo approved phawt hnuah Apex Body a lo thleng a, chumi chu kan approved hnuah Planning Dept. in Finance Dept. lamah pawisa pe turin an dil leh a, chuta tang chuan department-ah let lehin, anni hian an dept. chan hnuaia mi te theuh kha an lo pe chhuak ta thin a ni. A ruala submit pawh a dept. luhna a zirin a kal reiin a kal muang thin. A tlangpuiin Vety, Horti leh Industry ten diltu an ngah fal a, midang aia an meeting nguna an hah deuh a ngai tihna a ni,” tiin hmuh hma leh tlai thuah chuan department approved hma leh tlaiin kawng ro a sut thu a sawi.