FCAA duh lotu chu Congress chauh

MPCC chuan thuchhuah siamin, FCAA chungchangah hian MNF leh ZPM te hi inbei tur bik an awm loa, mawhphurtu an nih ve ve thu leh FCAA duh lotu tak tak party chu Congress Party chauh an nih thu an tarlang.

MPCC chuan Parliament a Forest (Conservation) Amendment Act (FCAA), 2023 siamtu BJP leh a thawhpui National Democratic Alliance (NDA) sorkar an dem tih tarlangin, ‘He dan ṭha lo tak pawmpuina resolution Mizoram Assembly House-ah ZPM Sorkarin a lo passed hi Mizoram tana pawi tak a nih avangin ṭha kan ti lo takzet,’ an ti.

July 23, 2023 ah FCA Bill Parliament a sawiho a nih khan Congress MP-ten nasa takin an dodal tih tarlangin MPCC chuah, ‘He bill hi Congress MP-ten nasa taka an dodalna karah Parliament a passed a ni. Bill passed a nih nî khan MNF MP (LS) pawh Parliament-ah BJP te lamah a ṭhu ngei a ni,’ tiin MNF chu FCAA hi an dodal tak tak a nih chuan he dan siamtu BJP an thawhpuina NDA hi chhuahsan a, BJP nen an thawhdunna chhuchat ngam turin an phut.

MPCC tarlan danin, October 15, 2025 khan MPCC President Lal Thanzara chuan AICC hotute Delhi ah hmuin FCAA chungchang a sawi pui. Mizoram map te en hoin international boundary aṭanga 100 kms huam Myanmar leh Bangladesh karcheh chhung kan nih deuh vek dante a sawi. AICC Gen. Secy KC Venugopal chuan Congress-in thuneihna an chan veleh he FCAA hi kan ennawn nghal ang, a lo ti a ni.

Kum 2019 MP inthlan dawnah Citizenship Amendment Bill (CAB) kan do ang tiin MNF an intiam nasa. Mah se, thlantlin an nih hnuah Lok Sabhaah a bill support tu an ni leh si. CAB an support chhan NE States a huam ve lo nia an sawi ang khan, FCAA in NE states huamtir ve lo tura an thawhpui NDA sorkar an nawr thlu thei a nih loh chuan, FCAA dan passed tute zingah MNF MP an tel avangin he dan hi do ve thei an ni lo. Dampa bye-election vote zawnna avanga total bandh neiah MPCC chuan MNF-te hi an ngai a ni.

Chief Minister-in YMA khawmpuilian Sakawrdaia neihah FCAA huam chin tur international boundary aṭanga km 10 nia a sawi hi thudik lo a ni. CM hian thupha a chawi lo a nih chuan thudiklo hmanga FCAA hlauhawmlo anga mipui zirtir tumna niah MPCC chuan a ngai.

MPCC chuan, ‘Dampa Bial hi Bangladesh hnaihte an nih avangin FCAA tuar ber tur an ni. Chuvangin, he dan ṭha lo tak passed tu zinga tel BJP leh an thawhpui MNF te, Mizoram Assembly a resolution passed a lo pawm tu ZPM-te hi Dampa bial mipui ten lo hnawl turin kan ngen che u a ni,’ an ti.