Engineers’ Centre sakna tur lungphûm phûm

Vawiin (7.1.2026) chawhma khan Chief Minister Lalduhoma chuan MINECO-ah Engineers’ Centre sakna tur lungphûm a phûm a, “Mizoram hi eirukna lakah pawh kan fihlim tlang,” a ti.

Chief Minister chuan Mizoram chu eirukna lakah pawh kan fihlim tlan thu sawiin, “CMS India Study chuan NITI Aayog leh Transparency International data-te atanga an teh danin, tunah hian Mizoram hi India rama eirukna tlem lama pahnihna kan ni. Pakhatna chu mihring sing sarih vel chauh chenna Laksadweep (Union Territory) a ni a, state zingah Mizoram chu pakhatna kan ni,” a ti.

Works department-te kalphung zirchiang a, kalphung tha zawk siamtu tur Study Team din a nih thu leh an report pawh thlirho a nih tawh thu sawiin Lalduhoma chuan, “Study Team-in tha zawka hmalak dan tur leh insiamthatna tur rawtna an neihte bawhzui a ni dawn,” tiin works lama an kalphung tam tak hi a tha zawnga tih danglam tum a nih thu a sawi.

CM chuan Mizoram Engineering Service Association (MESA) member-ten Engineers’ Club sakna tura sum an thawhkhawm chu fakawm a tih thu leh entawntlak a tih thu sawiin, “Sawrkar engineer-te hi kan ram hmasawnna ruhrel dinna kawng tinrenga a mawhphurtute in ni a, in kutah hmasawnna hnathawhna tur sum pawh a lut hnem a, inpe zo taka hna in thawh hi kan beisei tlat,” tiin a chah.

Engineer-te hian Zarkawt Babu tlângah Engineers’ Club changtlung tak an nei thin a ni. Engineer-te inthlunkhawmna pawl Mizoram Engineering Service Association (MESA) chu department hrang hrang awmkhawm an nih avangin chu hmun chu an hna chungchang sawiho nânte, conference neih nânte, Aizawl pawn lama posting nei tân headquarters dawra Aizawl an rawn kal chânga thlen nânte leh thil ṭul dang chi hrang hrang atan an hmang ṭhin.

Kum 2011 khân sawrkar-in engineer-te building leh ram chu Zarkawt YMA hnenah Stadium cum Recreation & Parking Centre atan a pek tak avangin engineer-te hian hmun leh building an nei tawh lo. Hmunhma pe leh tura vawi tam tak thuneitute an dil hnuah June 12, 2024 khân sawrkar chuan MINECO-a plot no. B-39 chu Engineers Centre atan a pe ta a ni.