Development chhawng thumah ka then thin

South Tuipui ZPM Joint Block chuan vawiin (11.9.2026) hian Hnahthial Electric Veng GSA Hall-ah conference an hmang a, an hun hmanpuitu Chief Minister chuan development chhawng thuma a then thin thu leh party mite induhsak dan tawk thiam a ngaihthu a sawi.

Chief Minister chuan, “Development hi chhawng thunah ka then ve thin. Short term, medium leh long term te. Hmarchha, Aieng, Hmunphiah, Sawhthing leh Buh ah te support price pein kan leisak tih kan hria, kuthnathawktute pawhin heng sawrkar thlan bikah hian hma la hram hram thei ila a duhawm hle. Thlai luman (crop insurance) kan ti ṭan. Ran lamah pawh Bawng, Bawk, Kel, Beram leh Sial te pawh insurance tih tum mek a ni,” a ti.

Tlema sum chang har deuh medium term-ah chuan CM rubber mission te, Tung te, Kuhva ahte hma an lak thu sawiin Lalduhoma chuan, “Thlai leh theite a hlutna tih pun dan ngaihtuah zelin, Kuhva Sawhgbawlna te, Sawhthing Sawhgbawlna te leh thlai atanga sum dehchhuahna tur beer siam tur te thlengin thlan an ni tawh,” tiin rang taka hlawkna kan hmuh theih mai leh kum 8/10 bawra hlawkna lo awm turte hmangin Zoram kuthnathawktute hi dawmkan an tum thu a sawi.

CM Duhoma chuan long term development chugchang sawiin, “A tawpah kuthnathawktute chauh niloin mitinten kan chhawr tlan theih tura hmawrbawk kan tum. Tunah hian North East Corridor Committee-ah Chairman-ah min dah ve a, NE state zawng zawng tana sumdawnna leh hmasawnna atan Thailand ram thlengin, Burma ram kaltlanga kawng sial tum a ni. Heng long term development hnu tur erawh hi chuan hun a duh rei a, sawrkarah chuan DPR siam chhung pawhin hun rei tak a duh thin. Chuvangin tuna sawrkarin ruahmanna kan siam tam tak hi nakin deuha a rah hmuh turte an nih vangin ZPM Sawrkar hian term khat mai lo deuh rorelna kan chan a ngai,” a ti.

Lalduhoma chuab chuan conference hmanga lo kal party mipuite chu, inthlan lehah mahni bial ṭheuhah tlin tum turin a chah a, “Party mite vote ringawt, mipui vote tel loin a sawrkar theih loh. Mizoram history-ah party mite invulh nasa lutuk, uchuak taka induhsakna avangin party member nghah ber an nih lai zelin ruling party an tla ṭhin. Party mite induhsak dan tawk kan thiam a ngai. Party sawrkar ni lo, mipui sawrkarah kan din reng a pawimawh. Ram rorelnaah Pathian ram thleng turin kan la ding reng em tih hi kan inven pui ṭheuh tur a ni,” tiin kalkhawm te a chah.