News

Mizoram Pradesh Youth Congress Committee (MPYCC) chuan thuchhuah siamin, vawiin (18.2.2026) hian Chawlhhmuna Chief Minister Lalduhoma insak a hmunah tlawhin an zirchian thu an tarlang a, “Chief Minister la ni rei lo ber Pu Lalduhoma hian Mizoram Chief Minister lo ni tawh zawng zawng hausakna a khum thuai dawnah kan ngai,” a ti.

Kum 2021-a Serchhip By-Election-ah khan tuna kan Chief Minister hian, ‘kei hi pawisa engmah ka nei lo. Bye-election hi ka tan a huphurhawm lutuk, general election-a ka leiba pawh ka la rul zo lo’ tiin dinhmun tha lo leh rethei, khawngaih thlak takin a in sawi nia tarlangin MPYCC chuan, ‘Khatiang khawpa pawisa nei loa insawi khan Chief Minister atana lakluh swearing-in a nih hma hauhin a chenna tur babel in sang sakna turin tlang a rawt nghal a, thla khat chhung teh meuh zing 9:00 atanga zan dar 10:00 chhunga in hmun chhum lo chat loin a lai zui leh nghal zat thei leh si hian Mizoram mipui mak tih leh rinhlelh a hlawh nasa hle,” tiin Lengpui ram hralh chungchanga a hralhna man an thlakhlelh thu a sawi leh ZPM Sorkar hlima ram hralh tur hmanhmawh phelenga file an kal tir khan Chief Minister in sak hi a inzawm ngeiah mipuiin an ngaih thu a tarlang.

MPYCC chuan building drawing hi Hrangthanga Zote (R. No A/AMC/2011/13) a nih thu tarlangin, “A neitu hi Ruata s/o Lalduhoma a ni. Building hi ground floor tel loin Mizo chhiara chhawng 6 tura duan a ni. Ground floor hi 66 m2, 1st Floor 150 m2, 2nd 226 m2, 3rd Floor 352 m2, 4th floor 443 m2, 5th floor 504 m2 leh 6th Floor 504 m2 niin building pumpui zau zawng (area) hi 2245 sq.m teh meuh a tling a ni.
Serchhip By Election-a khatiang taka insawi rethei si khan Pu Lalduhoma hian Zonet Zoram Kalsiam in an kawmnaah, Chief Minister PA ah kum 6, IPS, MP, MLA ah vawi nga (5) a tlin tawh thu leh a Bbackground thlirin mahni in chu sa ve hle thei tur niin a insawi lian leh hle si hi hausak thutna a awm ngeiah kan ngai,” an ti.

Lalduhoma hian tuna a in sak mek hi SBI hnuaia UNNATI Scheme hnuaiah nikum 2025-ah loan an lak thu a sawi tih tarlangin MPYCC chuan, “Mah se, hei hi mipuia in phatmarna leh mipui rilru bumna mai a ni. UNNATI hnuaiah hotel, home stay, restaurant, hospital, industry din nante industry tihlenna atan te (plant and machinery atan bik) a loan laten an loan lak zatve an claim let leh theihna scheme a ni. Mi pakhatin cheng vbc 250 thleng an la theiin UNNATI hnuaia subsidise dil hi mi 16 awm tawhin mi 3 approved tawh zingah Pu Lalduhoma fapa hming a tel loiin dilna 4 hnawl a ni a, dilna lut thar pawh a awm,” tiin Lalduhoma’n bank in an lo pe anga a sawi chu thil dik lo let tawp niin an tarlang.