News

Vawiin (14.5.2026) hian Chief Minister Lalduhoma chuan CM Conference Hall-ah Mizoram Sorkar quarters luah dilna leh pekna online hmanga kalpuina Quarters Allotment Management System (QAMS) leh state pawna Mizoram House-te online hmanga book-na Mizoram House Online Reservation System a hawng.

Thusawiin Chief Minister chuan, “Sorkar quarters luah dilna hi lehkha thehluh hmangin kan kalpui a, computer pakhatah dahthat a ni. Quarters ruak te, pension leh thihnate avanga han singsak ngaite pawh manual veka kalpui a ni a, a enkawltu department tan leh a diltute tan hian a buaithlakin hun a heh thin. Hetia online hmanga kalpui a nih hi chuan quarters luah dilna hi a hmuna va lak a, va thehluh leh kher ngai loin, awlsam takin internet kaltlangin a tih theih tawh dawn. A enkawltute lam tan pawh a lo awlsam phah dawn a ni,” a ti.

Mizoram House pawh office-a kala, va dil kher ngai loin online hmang bawkin an dil thei tawh dawn avangin, Aizawl pawna chengte tan phei chuan a hahdamthlak zual dawn thu sawiin Lalduhoma chuan, “Tunlai thiamna hmanga mipuite tana awlsamna siam hi kan sorkar hian a ngaipawimawh,” tiin uar deuh deuh a, Mizoram hi digital state-a siam hial an duh thu a sawi.

Quarters Allotment Management System hi nikum August thla atanga buaipui tan kha a ni. ICT Department te siam a ni a, a hman theih nghal a, a site address chu: qams.mizoram.gov.in a ni.

Mizoram House Online Reservation System hi Mizoram State e-Governance Society-te siam a ni. Kumin March 2, 2026 atang khan enchhin tan niim official-a hawn a nih hma hauhin dilna 2,796 a lut hman a, mi 1,640 te chu allotment pek an ni. A address chu: mizoramhouse.mizoram.gov.in a ni.