CM-in dawt min hrilh &#8211; MZP

MZP hruaitute chuan vawiin (23.5.2026) hian Aizawl Press Club-ah press conference neiin, Tourism director atana sorkar hnathawk pension tawh R Lalrodingi ruat nawn chungchangah Chief Minister Lalduhoma’n a office-ah ngei dawt a hrilh thu an sawi.

MZP President Dr. C Lalremruata chuan May 13, 2026 khan R Lalrodingi chungchangah Chief Minister a office-ah an hmuh thu sawiin, “OSD to CM chu political appointment a ni a, Tourism director atana ruat nawn kan duh loh thu chiang takin kan thlen. CM hian ennawn a ni dawn tih ziakin min tiam a, kan huntiam May 14 hnuah pawh CM intiamna avangin sorkar hmalakna kan ngaihchan phah,” a ti.

OSD to CM atan chauha R Lalrodingi ruat a nihna a chhuah hnuah niminah Tourism director atana ruatna a chhuah leh thu sawiin MZP President chuan, “Mizoram Sawrkar leh Chief Minister-in a office-ah ngei dawt min hrilh. Mi pakhat induhsak bikna a awm hi pawi kan ti,” tiin tun hnuah thleng tawh lo se an duh thu a sawi.

MZP President chuan sorkar hnathawk pension tawh rawih nawn hrim hrim an duh lo tih sawiin, “Tuna mi phei hi chu rawih nawn bik liau liau a ni,” a ti.

R Lalrodingi chuan social media-ah ‘sum tam tak aiin hmingthat hi thlan zawk tur a ni’ tih a post thu sawiin Dr. C Lalremruata chuan, hmingthat a duh chuan bang mai se an duhthu a sawi.

An hmalak zel dan tur zawhna chu MZP President chuan, an hmalak zel dan tur chu committee-in an rel tur thuin a chhang.