CM hoin Mi-PRAGATI an thukhawm

Vawiin (24.8.2026) hian Chief Minister Lalduhoma kaihhruaiin Mizoram Pro-Active Governance and Timely Implementation (Mi-PRAGATI) meeting neih a ni a, state chhunga hmasawnna hnathawh lian zual thlanchhuahte thlirhoin, hna kal muan chhan te, harsatna awm sut kian dan tur te leh hmalak zel dan turte an sawiho.

An project thlirhote chu:

1.Thenzawl Peace City Master Plan: Thenzawl Peace City tura master plan buatsaih mek chu thlirho niin, sq. km 85 (Village Council 6: Thenzawl East, West, South, Kanan, Vengthar leh Buangpui) a huam a, hmasawnna hna thawh theihna hmun (developable area) hi sq. km 51.81 (60.95%) a ni. Hmalakna hmasa atan Early Bird Project hmangin Solid Waste Management System (cheng vbc. 4), Dilpui Lake Area cheibawlna (cheng vbc.8) leh saturday market thar siamna (cheng vbc. 3) te thawh hmasak tum a ni. Lau River tui lian ven leh cheimawi hna cheng vbc. 23 hmanga thawh tura ruahman a ni bawk.

2.Thingsulthliah Conference Centre: Swadesh Darshan 2.0 hnuaia cheng vaibelchhe 99.71 senga CYMA Conference Centre, Thingsulthliah sak mek chu MTDA leh PWD hmalaknain kalpui mek a ni. Hmun laihzawl leh kawng siam hna thawk tan tawh mah se, fur ruahtui nasat avangin lei vung paih leh hmanrua chawhluh a harsa a, hna a muan phah deuh nia sawi a ni.

3.Mizo Fiber Grid Network (MFGN): SASCI Part-V (2022-23) cheng vaibelchhe 50 sanction hmanga Mizoram District Headquarters zawng zawng thlunzawmna tur OPGW (543 km) leh ADSS (82 km) hna ICT Department, M/S ZENICS, Ernst & Young LLP leh RailTel ten an thawk mek. OPGW hi 24 km zawh tawh niin, ramhnuai kawng tha lo leh ruahtui vanga harsatna awmte sutkian dan leh December 2026-a zawh hman dan tur sawiho a ni.

4.MINECO Integrated Office Complex: SASCI Part-V (2024-25) hnuaia cheng vaibelchhe 60 sanction hmanga MINECO-a sorkar pisa hmunpui PWD leh Buannel Geo Solution & Services ten an sak mek chu physical progress 15% thleng thawh a ni tawh a; fur lai a nih avanga hna a kal chak theih rih loh thu tarlan a ni. Integrated Office Complex Commission hrang hrangte awmna tura duan a ni.

5.Pukzing to Silsury Kawng Laih Hna (21 km): Mizoram leh Bangladesh inkalpawhna, sumdawnna kawng pawimawi tak ni tur, Chief Minister-in a ngaihpawimawh em em kawng hi NESIDS (Roads) cheng vaibelchhe 100.24 sengin PWD-in intermediate lane-a an lai mek. Physical progress 8.38% ni tawhin, fur ruahtui vangin chak takin kalpui a harsa rih. Tin, zangnadawmna (compensation claim) chungchanga harsatna awmte pawh an sawiho a ni. Kawng hi January 2028-a zawh tura ruahman a ni.

Meeting-ah hian UD&PA Minister K. Sapdanga, PWD Minister Vanlalhlana, Art & Culture Minister C. Lalsawivunga, ICT Minister Dr. Vanlalthlana, Tourism Minister Lalnghinglova Hmar bakah Chief Secretary Khilli Ram Meena, Principal Secretary Sudhir Kumar leh official pawimawhte an tel