News

Nimin (August 6, 2026) khan Chief Minister Lalduhoma hoin Mizo Kohhran Hruaitu Committee (MKHC) aiawh Rev. Lallawmthanga, Secretary leh Council of Churches in Mizoram (CCM) aiawh Rev. Lalhmangaiha, General Secretary-te chuan Union Home Minister Amit Shah chu Parliament House, New Delhi-ah hmu in Foreign Contribution (Regulation) Amendment Bill, 2026 leh Foreign Contribution (Regulation) Amendment Rules, 2026 chungchangah joint memorandum an thehlut.

Joint memorandum-ah hian FCRA Amendment Bill, 2026 leh a hnuaia dan hrang hrangte chu tuna duan a nih ang hi chuan pawm harsa an tih thu an thlen a, siamthat a, ennawn a tul thu an tarlang a ni.

An rawtna thlen zinga pakhat “He dan hi tunhma lam huap (retrospective)-a hman loh ni se” tih chu Union Home Minister hian an ngenna ang hian retrospective a tih a ni lo ang tih a lo tiam a ni.

He dan awmsa leh siam that rawt tharnate chu ziakin pek a lo tiam bawk. Memorundum–a an thu thlente chu a mal malin a chhanna ziaka pek a lo remti.

Heng bakah hian Airports Authority of India (AAI) hnena Lengpui Airport hlan thuai tura Chief Minister-in a ngenna chu rang taka bawhzui a nih tur thu Union Home Minister hian a lo hrilh a ni.

Chief Minister chuan Cooperation Department hmalakna hrang hrangte a hmun ngeia hmuh pui turin a sawm a, Union Home Minister chuan hun remchang hmasaah Mizoram lo kal a tum thu a hrilh.

File picture