News

Central YMA chuan a hnuaia tarlan ang hian 8th Scheduled-a Mizo tawng telh tura hmalak chungchangah a hnuaia tarlan ang hian thuchhuah siam.

CYMA thuchhuah :

Mizoram Legislative Assembly Session neih mekah India Danpui 8th Schedule-a Mizo tawng dah a nih ve theihna tura ” “Eighth Schedule to the Constitution of India-ah Mizo Tawng hi telh tura hma lak ni rawh se.” tih Resolution Pass a ni hi Central YMA chuan lawmawm a ti tak zet a ni.

YMA hian India Dan pui-a 8th Schedule-a Mizo tawng dah a nih theihna turin theihtawpin hma a lo la tawh thin a. Kum 1997 YMA General Conference, E. Lungdar-a neih chuan, “Mizo tawng hi India Constitution 8th Schedule-ah telh a nih theih nan YMA-in hma lak ni rawh se” tiin a lo rel tawh a, heta tang hian India ram hruaitu lian – President, Vice President, Prime Minister, Home Minister etc. ah te tum engemaw zat lehkha thehluh a lo ni tawh a. Central YMA hruaitute tum hnih lai New Delhi-ah kalin Ministry of Home Affairs hotute hnenah thlen a lo ni tawh bawk a.

YMA chuan Zofa hnam peng hrang hrangte tawng hi humhalh a, tih hmasawn a țul zia hriain hma a la zel a. Chutihrualin, tuna kan hman mek, Mizo Tawng hi kan inbiakpawhna tawng tlanglawn ber a nih avangin inpumkhatna atan a pawimawh a, hma a sawn theihna tur leh a than zelna turin hma a la mek zel a.

8th Schedule-a Mizo tawng telh ve a nih theihna turin Central YMA chuan theihtawp a chhuah zel dawn a ni.