News

Aizawl SP Zosangliana chuan vawiin (4.8.2026) chhun khan GIG Motors Arena Showroom, Edentharah Maruti Suzuki Brezza chhuak thar a tlangzarh a, lirthei changkang telh telh mah se, a khalhtu mihring an pawimawh ber tih a sawi.

Aizawl SP hian Mizorama hralh chhuah turin India rama car hriat hlawh tak Brezza thar a khuh hawng a, automobile industry-in hma a sawn nasa a, India ramah Brezza leitu an tamin innghahna tlak car a ni tih a hriat a, tunah thiamna sang leh changkang zawk hmangin thuam that a ni tih sawiin, “Thiamna sang telh telh mah se, mihring an chungnung zawk tho tho a ni,” a ti.

Lirthei chu eng anga tha leh changkang pawh ni se a thununtu chu mihring an nih thu sawiin Zosangliana chuan, “A khalhtuten hma an sawn ve zel a pawimawh a ni. India ramah lirthei chetsual avangin thihna a thleng hnem hle a, a khalhtute fimkhur tawk loh vang leh rui chunga an khalh vangtein chet sualna a thleng thin,” tiin inthununna tha tak nen fimkhur taka lirthei khalh a pawimawh a, traffic dan zawng thlenga hmasawn zel a ngaihzia a sawi.

Aizawl SP-in police record a sawi danin, nikum 2025 chhungin Mizoramah lirtheia chet sualna vawi 111 awmin heng zinga 85-ah hian thihna a thleng a, mi 95 in nunma an chan.

2016 khan Brezza tichhuakin India ramah maktaduai 1.4 chuang leh khawvel pumah maktaduai 1.5 chuang hralh chhuah a nih hnuah a thar an tichhuak a, Maruti Suzuki-in metre 4 tling lo car an siam chhuah tawhah Turbo Engine an hmanna hmasa ber a ni nghal. Mizoram dealer GIG Motors chuan khuh hawnna inkhawmah hian mi pahnih hnenah an hralh chhuak nghal a ni.

Brezza chhuak tharah hian a khalhtu leh a chhunga chuangte himna an ngai pawimawh a, Mizorama an zawrh zingah a man tlawm ber cheng nuai riat leh sang nga chuang niin a to ber nuai sawm pahnih sing nga chuangin a lei theih a ni.