Bana Kaih thawh thumna tlangzarh

Vawiin (18.9.2026) hian Irrigation & Water Resources Conference Hall-ah Chief Minister Lalduhoma chuan Bana Kaih thawh thumna (Handholding 3.0) a tlangzarh.

Thu sawiin Chief Minister chuan, “Kum tam tak kan lo tlangau pui thin, thlai thar leina budget-a dah te, loan pung awm lo (100% interest subvention) leh bank guarantor-a sorkar a tan theih thute chu Bana Kaih Scheme kaltlang hian kan tihlawhtling chho zel a, kalphung thar chhinchhiahtlak, ram tana tangkai bawk si a ni. Bana Kaih hmangin moral reforms a thleng mek. Mizoram economy hi sang taka chawisan kan tum,” tiin Bana Kaih a hlawhtlin theih nana mawhphurtute zawng zawng chungah lawmthu a sawi a ni.

CM thusawi langsar dangte :

1.Bana Kaih hian a huam zau a, sorkar development scheme zawng zawng deuh thaw hi a huam. Mi nawlpuiin kan hriat lar, thlai thar lei, loan component leh CM Package bakah infrastructure din nan project eng emaw zat kan kalpui bawk. Turmeric Processing Industry at Industrial Growth Centre, Luangmual, Ginger Processing Unit at Horti Centre, Sairang, CMs Innovation Challenge, Mizoram Handholding Venture Capital Fund, Procurement of Solar Dryer & Slicing Machine, Wheat & Maize Contract Farming leh Construction of Drying Shed and Hay Making at AH&Vety Farm at Thenzawl te chu a langsar zual an ni.

2.Partner Banks-te nena kan thawhhona a tha. Progress partner-ten loan an rulh that thute kan lo hria. Bana kaih hmangin moral reformation a thleng mek a ni.

3.Kan thalai, ram pawna hna zawng mekte tan bank loan lak tur a awm loh avangin mi tam takten harsatna an tawk tih kan hria. Foreign Placement Loan hi Hand Holding kaltlanga inpek dan kan ngaihtuah mek. Hei hian thalai engemaw zat employment a siamsak theih kan beisei.

4.Vanduaina avang liau liaua kan progress partner hlawhchhamte tan a thawh thumnaah hian Rehabilitation Scheme siam kan tum.

5.Report-ah khan department thenkhatten partner in ngah bik hle tih a lang. Kan flagship scheme hi ngaihpawimawh hmasaa nei thin tura kan inngen ang khan theihtawp in lo chhuah zel dawn nia.

6.Organic farming hi uar deuh deuh kan duh a, state pawn atanga chemical fertilizer kan lakluhte hi tlem tial tial se, keimahni siam organic fertilizer hi ngah tial tial ila kan duh hle. Permanent Farming pawh kan uar dawn a ni.

7.Monitoring uar zawka kalpui kan tum a, Mizorama project tam ber hlawhchhamna chhan chu vil zui a nih thin loh vang a ni. Chuvangin, kan Progress Partner zawng zawngte khan – Implementing Department leh bank-te pawhin an rawn enzui dawn che u tih lo hria ula, dik tak leh rinawm takin pawisa lo hmang ang che u,

8.Handholding scheme hi Vishit Barat 2047 tinzawn rana kalpui kan ni . Moral Reformation kalpui chung zelin Mizoram economy hi sang taka chawikan kan tum. Kum rei lote chhunga eizawnna thar tam tak siam a, state dangte ruala kal ve kan duh a ni. Chu hna thawktu “Team Mizoram’ chu nang leh kei hi kan ni a, theihtawp chhuaha kan tanho a ngai tih hi kan hre reng dawn nia, tihte an ni.

Bana Kaih thawh thumna dilna hi online handholding.mizoram.gov.in ah thehluh theih a ni a, online-a dil thei lo tan DC, SDO leh BDO office-ah dil theih a ni. A diltute tanpuitu tur thawktu hrang dah vek an ni a, pawisa chawi a ngai lo. Tin, Bana Kaih dil duhte tana zawhfiahna helpline number a awm a, a number chu 8119-019-900 a ni. A dil dan inzirtirna hi youtube-ah en theihin a awm bawk.