ATI-ah training an tan

Vawiin (8.9.2026) chhun khan Adviser to CM TBC Lalvenchhunga chuan Administrative Training Institute (ATI) Training Hall- ah Combined Civil Service Officers thar 34 te tana buatsaih Basic Foundation Training Course a hawng. He training hi October 30, 2026 thleng neih tur a ni a, an riaklut dawn.

TBC Lalvenchhunga chuan digital lama hmasawnnain awlsamna tam tak min pek rualin Artificial Intelligence rin leh lutuk a him lo tih sawiin, “AI in a thlak (replace) theih turin awm suh u. Department-centric official te, service-centric officials-te vangin sorkarin harsatna a tawk thin a, mipui dah pawimawh ber (citizen-centric) ula. In career hi chu in thil tih, in result leh in thawhchhuah (delivery) atanga teh ni zawk rawh se, chu chu in hnuhma (legacy) tur a ni. He Basic Foundation Training pawh hi service hrang hrangte inkara inpawhna leh thawhhona tha thlentu ni ngei rawh se,” a ti.

Adviser to CM chuan officer tharte chu an kal zelna turah duhsakna a hlan a, “Induhsakna (favouritism) vanga tling ni loin, in phu vanga tling in ni a, in chhuanawm hle. Amaherawh chu, officer tlin hi a tawpna ni loin, a bul tanna zawk a ni. In thutna tur office pawh nangmahni ta ni lovin mipui ta a ni zawk a. A lalna lai nuam ti a, mawhphurhna hlamchhiah si in nih chuan officer hlawhchham in ni dawn. Sorkar hnathawkte hi sorkar khawl nghet in ni a, democracy-ah in pawimawh em em a, danglamna thlentu tur in ni,” tiin thlemna hrang hrang an tawh hunah ‘Dan chhungah a awm em?’ tiin inzawt thin turin a fuih.